Հայաստանում գործող «ADM Դայմոնդս» ադամանդի գործարանը որևէ կոռուպցիոն և քրեական սխեմաներում ներգրավված չէ, այն գործում է բացառապես օրինական դաշտում: Մայիսի 26-ին հրավիրված ասուլիսում «ADM Դայմոնդս» ադամանդի գործարանի փոխտնօրեն Արսեն Արտաշեսյան և գործարանի հիմնադիր ընտանիքից Արտակ Բաղիկյանը մանրամասն անդրադարձել են իրենց ուղղված բոլոր այն քննադատություններին, որոնք վերջին շրջանում տեղ են գտել մամուլում:
«Նշվում է, թե իբր մենք մաֆիոզ կառույցների մեջ ենք ներգրաված, առանց փաստաթղթավորման ներմուծումներ ենք կատարում, աշխատողներին աշխատավարձ չենք վճարում: Մեջբերումներ են արվում ինչ-որ գործարարներից, որոնք չեն ցանկացել ներկայանալ: Մենք այսօր պատրաստ ենք հատ-հատ բոլոր հնչեցված մեղադրանքներին տալ հիմնավորված պատասխաններ»,-ասաց Արսեն Արտաշեսյանը:
Արտակ Բաղիկյանը սկսեց այն մեղադրանքից, թե աշխատավարձ չեն վճարում իրենց աշխատողներին: Բաղիկյանն ընդգծեց, որ 2017 թվականի մարտից՝ ընկերության հիմնադրման պահից, չի եղել գոնե մեկ ամիս, որ ոչ միայն աշխատավարձերը չվճարվեն, այլև աշխատավարձերն ուշացվեն: Ավելին, եղել են նաև ավանսներ: «2020 թվականի ապրիլին, երբ մեր գործունեությունն օրենքով արգելված էր, մենք բոլոր աշխատակիցներին ֆինանսական օգնություն ենք տրամադրել: Ես ոչ միայն տրամադրում եմ այդ մասին փաստող փաստաթղթերը, այլև հորդորում եմ անձամբ ճշտել մեր աշխատողներից»,-ասաց նա:
Ընկերությանն ուղղված հաջորդ մեղադրանքը վերաբերում է քվոտային, դա այն չափաբաժինն է, որը տրված է մեկ կամ մի քանի ընկերություններին արտոնյալ պայմաններում որևէ ապրանք ներմուծելու կամ արտահանելու համար: «Մեզ մեղադրեցին այն բանի համար, թե իբր ունենք պետական քվոտա պատրաստի ադամանդի արտահանման համար, ընդգծում եմ՝ պատրաստի ադամանդի: Ասեմ, որ Հայաստանի պատմության ընթացքում պատրաստի ադամանդի արտահանման քվոտա չի եղել: Այժմ էլ նման բան չկա: Նշեմ, որ Հայաստանի Հանրապետությունը հումքի մասով ունեցել է քվոտա 2002-2005 թվականներին, սակայն այդ ժամանակ մեր ընկերությունը գոյություն չի ունեցել: Քվոտաների մասին հարց բարձրացնողները թող գնան այդ ժամանակվա ընկերություններից հարցնեն»,-ասաց Բաղիկյանը:
Հաջորդ դիտարկումը, որին ընկերության հիմնադիրն անդրադարձավ, այն է, թե իբր, ընկերությունը հումքի ներմուծում չի ունեցել, բայց արտահանել է պատրաստի արտադրանք: «Թեպետ հումքի ներմուծումն առևտրային գաղտնիք է, սակայն մենք, հաշվի առնելով ստեղծված իրավիճակը, ձեզ ենք տրամադրում 2019 թվականի վերջի և 2020 թվականի ներմուծած հումքի բոլոր փաստաթղթերը: Հաջորդ հարցը, որին կցանկանայի անդրադառնալ այն է, թե ինչպես է ստացվում, որ արտադրանքի ծավալն ավելանում է, բայց աշխատողների թվաքանակը՝ ոչ: Կարող ենք հավաստիացնել, որ 2019 թվականին մեր կողմից ձեռքբերված նորագույն լազերային սարքավորումներն օգնում են տասնյակ անգամներ բարձրացնել ընկերության արտադրողականությունը»-հավելեց ընկերության հիմնադիրը:
Գործարանի ղեկավրությունն անհեթեթություն է համարում այն դիտարկումները, թե իրենք զբաղվում են մաքսանենգ ճանապարհով ադամանդների ներմուծմամբ և արտահանմամբ: Ընկերության ղեկավարությունը վստահեցրեց, որ շարունակելու են գործել օրենքի դաշտում, ընդլայնվել, բարձացնել աշխատավարձերը և ավելացնել վճարվող պետական հարկերի չափը: «Կազմակերպությունը երբեք չի ունեցել արտոնյալ պայմաններ: Մեզ մոտ պարբերաբար լինում են հարկային ստուգումներ: Այս տարի արդեն 65 օր շարունակ գտնվում ենք հարկային ստուգումների մեջ: Մեզ չենք զբաղվել ու չենք զբաղվում քաղաքակությամբ, մեզ մի ներքաշեք ինտրիգների մեջ: Մենք ցանկանում ենք ոլորտը զարգացնել մեր երկրում: Եթե կարող եք օգնել, ապա օգնեք, եթե չեք կարող, գոնե մի խանգարեք»,-եզրափակեց Արտակ Բաղիկյանը:
