Երբ մենք խոսում ենք պետական կառավարումից, շատ արագ ամբողջ անձնակազմը կամ դրա մեծ մասը փոխելը գործնականում անհնարին է: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Արթուր Հովհաննիսյանը՝ անդրադառնալով վարչապետի հայտարարությանը, թե դեռ հիմա էլ պետական կառավարման համակարգի կեսը դիմադրում է հեղափոխությանը:
«Սրան կարող է հաջորդել դիտարկումը, որ երկու տարի անցել է, սա շատ արագ անվանել չի կարելի: պետք է անդրադառնանք մյուս կետին, որը մեր քաղաքական թիմի հիմքերից մեկն է. դա անձի վերափոխման հնարավորությունն է, երբ անձինք երկար տարիներով աշխատելով կոնկրետ խաղի կանոններով, հիմա արդեն հնարավորություն ունեն աշխատելու բոլորովին այլ խաղի կանոններով:
Այս 2 տարվա ընթացքում բավականին կադրային փոփոխություններ են եղել և չի կարելի ասել, որ այդ կադրային փոփոխությունները չեն իրականացվել: Այստեղ խնդիրն այդ փոփոխությունների ծավալի ու որակի մասին է: Ես ինքս մինչև խորհրդարան գալը աշխատելով կառավարությունում, բախվել եմ այդ խնդրին»,-ասաց նա: