Չինաստանի կառավարության կորոնավիրուսի դեմ պայքարի հարցերով գլխավոր խորհրդական Չժուն Նանշանը հայտարարել է, որ սկզբնական շրջանում Ուհան քաղաքի տեղական իշխանությունները թաքցրել են կորոնավիրուսի բռնկման իրական չափերը: Այս մասին նա ասել է CNN-ին տված հարցազրույցում:
«Տեղի իշխանությունները չէին ուզում այդ պահին ասել ճշմարտությունը»,- ասել է Նանշանը, չբացառելով, որ վարակվածների իրական թիվն այդ պահին Ուհանում հայտարարված թվերից ավելին է եղել։
Նա նշել է, որ սկսել է կասկածել, երբ Ուհան քաղաքում պաշտոնապես գրանցված դեպքերի թիվը 10 օր շարունակ նույնն է եղել, այն դեպքում, երբ մարդիկ արդեն սկսել էին վարակվել նաև Չինաստանի սահմաններից դուրս։
«Ես չէի հավատում այս արդյունքին, ուստի շարունակեցի հարցնել, և այնուհետև ինձ դժկամությամբ տեղեկություններ տրամադրեցին», – ավելացրել է նա:
Հեռուստաալիքի տվյալներով, հունվարի 20-ին Չժուն Նանշանը Չինաստանի պետական հեռուստաալիքի եթերում հայտարարել է, որ կորոնավիրուսը կարող է փոխանցվել մարդուց մարդուն, չնայած, որ Ուհանի առողջապահական մարմինները շաբաթներ շարունակ պնդում էին, որ մարդկանց միջև վիրուսի փոխանցման հստակ ապացույց չկա, և որ բռնկումը «կանխարգելի և վերահսկելի է»:
