Գերմանիայի և Ավստրիայի միջեւ սահմանային անցակետերը լիովին բաց կլինեն հունիսի 15-ին:
Այդ մասին հաղորդում է ավստրիական ARA գործակալությունը:
Ուրբաթ օրվանից սահմաններում կանցկացվեն միայն ընտրովի ստուգումներ: Արդեն այսօր սահմանային գոտու բնակիչների համար բացվել են Բավարիայի և Ավստրիայի միջև մի քանի փոքր սահմանային անցումներ:
Երեքշաբթի Ավստրիայի կանցլեր Սեբաստիան Կուրցը Գերմանիայի կանցլեր Անգելա Մերկելի հետ քննարկել է սահմանի հարցը: Չորեքշաբթի օրը նիստի ժամանակ Գերմանիայի կառավարությունը կքննարկի այս հարցը:
Կուրցը երեքշաբթի երեկոյան ասել է, որ ակնկալում է, որ սահմանը կբացվի հունիսին: Նրա խոսքով ՝ Ավստրիան նույնպես ձգտում է ազատականացնել սահմանային ռեժիմը հարևան մյուս երկրների հետ:
Եվրոպական հարցերի նախարար Կարոլին Էդտշտադլերին և Արտաքին գործերի նախարար Ալեքսանդր Շալենբերգին հանձնարարվել է կազմակերպել Շվեյցարիայի, Լիխտենշտեյնի և Արևելյան Եվրոպայի հարևան երկրների հետ սահմանների բացման քայլ առ քայլ գործընթացը, «եթե վարակն այնտեղ հսկողության տակ լինի»:
Ավստրիայի տուրիստական արդյունաբերությունը մեծապես կախված է գերմանացի հանգստացողներից:
Համաճարակային ճգնաժամի կապակցությամբ Գերմանիան որոշում է կայացրել սահմանային հսկողություն սահմանել Դանիայի, Ֆրանսիայի, Լյուքսեմբուրգի, Շվեյցարիայի և Ավստրիայի հետ, հսկողությունն ուժի մեջ է մինչև մայիսի 15-ը:
Հիշեցնենք, որ Եվրահանձնաժողովը մայիսի 13-ին կհաստատի համապարփակ ռազմավարություն, որն ուղղված կլինի Եվրոպական միությունում զբոսաշրջային բիզնեսի բացման կազմակերպմանը:
