Առաջիկա տասն օրերի ընթացքում եթե արտառոց ոչինչ տեղի չունենա, ապա պարետատունը կհանի գրեթե բոլոր տնտեսական սահմանափակումները: Բացի դրանից՝ Ազգային ժողովի արտահերթ նիստում այսօր քննարկվել է Պետական բյուջեի մասին օրենքում փոփոխությունների նախագիծը: Ի՞նչ հաշվարկներով են կատարվում այս քայլերը: Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Գևորգ Պապոյանը և «Լուսավոր Հայաստան» խմբակցության պատգամավոր Կարեն Սիմոնյանը:
Ազգային ժողովում այսօր թեժ մթնոլորտ էր տիրում՝ ԱԺ պատգամավորներն անցել էին փոխադարձ վիրավորանքների: Կարեն Սիմոնյանի խոսքով՝ այն, ինչ այսօր տեղի ունեցավ վատ միջադեպ էր և հարիր չէր Ազգային ժողովին: «Բայց և՛ մեր գործընկերները, և՛ քաղաքացիները պետք է հիշեն, որ քաղաքական գործիչները, մասնավորապես «Լուսավոր Հայաստան»-ի պատգամավորները երբ մտնում են ԱԺ դահլիճ, իրենց ինքնասիրությունը չեն թողնում դռներից այն կողմ, և մեր թիմի անդամին ուղղված ցանկացած վիրավորանք պատասխան է ստանալու, դեռ մի բան էլ ավելին: Ես համարում եմ, որ տեղի ունեցածը սադրանք էր՝ ուշադրությունը գլխավոր թեմայից՝ բյուջեի քննարկումից, ինչպես նաև այն առաջարկից շեղելու համար, որն արել էր «Լուսավոր Հայաստանը», այն է՝ եղած պահուստային միջոցներից 50 միլիարդ դրամ հատկացնել 500 000-ից ավելի կարիքավոր ընտանիքներին: Մեր գործընկերները դիմեցին անձնական վիրավորանքների, ինչն անընդունելի է»:
Գևորգ Պապոյանը, անդրադառնալով միջադեպին, հավելեց, որ Ալեն Սիմոնյանի կողմից համապարփակ պատասխան տրվել է, նա ներողություն է խնդրել ժողովրդից ԱԺ դահլիճում տեղի ունեցածի համար. «Բայց ցավում եմ, որ պառլամենտարիզմի մասին շատ խոսող ԱԺ խմբակցության ղեկավարը իրեն թույլ է տալիս հայհոյել Ազգային ժողովում: Հուսով եմ՝ այլևս նման դեպք տեղի չի ունենա նոր որակի ԱԺ-ում, հայհոյանքները բնորոշ են եղել նախորդ ԱԺ-ներին»:
«Լուսավոր Հայաստան» խմբակցությունը դեմ է բյուջեի մասին օրենքի փոփոխությունների նախագծին: Կարեն Սիմոնյանի խոսքով՝ կառավարությունը բերել է մի նախագիծ, որը եթե ընդունվի, հնարավորություն է տալու փոփոխություններ կատարել բյուջեի ծրագրերում, բյուջեում կա 221 ծրագիր, որոնցում նախատեսվում են փոփոխություններ կատարել… «Այդ դեպքում ԱԺ որևէ քաղաքական ուժ չի կարող վերահսկել, թե ինչ գործընթացներ են տեղի ունենում՝ կապված բյուջեի հետ»,- ընդգծեց Կարեն Սիմոնյանը:
Գևորգ Պապոյանը պարզաբանեց, որ պետական բյուջեն բաղկացած է երկու մասից՝ եկամուտներից և ծախսերից, և հիմա եկամուտների մասով առաջացել է խնդիր. «Ակնհայտ են ներքին և արտաքին գործոններ՝ կապված կորոնավիրուսի համաճարակով պայմանավորված տնտեսական ճգնաժամի հետ: Մենք ունենալու ենք հարկային եկամուտների պակաս, քան նախատեսված էր, և դրա հետևանքով առաջանալու է բյուջեի ավելի մեծ դեֆիցիտ… Եվ կառավարությունը, որպեսզի կարողանա իրականացնել իր նախանշած ծրագրերը, խնդրել է փոփոխություններ կատարել պետական բյուջեում»:
Կարեն Սիմոնյանի դիտարկմամբ՝ անհականալի է, թե ինչու է կառավարությունը քարտ բլանշ ուզում ամբողջ տարվա համար, եթե կարող է ամիսը մեկ կամ եռամսյակը մեկ իրավիճակին համահունչ փոփոխությունների մասին խոսել:
Մանրամասն՝ տեսանյութում:
