«Տեղի ունեցածին սպասել եմ 2007-ի աշնանից. Լևոն Տեր-Պետրոսյանի քաղաքական վերադարձի շրջանից սկսած՝ անընդատ իմ մտքում կար նախ՝ Ռոբերտ Քոչարյանի, հետո նաև Սերժ Սարգսյանի իշխանությունից ազատվելու երազանքը»,- այս մասին «Առաջին լրատվական»-ի հետ զրույցում ասաց Ազգային ժողովի Գիտության, կրթության, մշակույթի, Սփյուռքի, երիտասարդության և սպորտի հարցերի մշտական հանձնաժողովի նախագահ Մխիթար Հայրապետյանը, ով երկու տարի առաջ հեղափոխականների առաջին խմբում էր:
«Իհարկե մեր երկրում ամբողջովին չի իրականացել այն երազանքը, որ ունեինք երկու տարի առաջ, բայց, անշուշտ, մեր պետությունը մեծ առաջընթացներ գրանցել է: Հեղափոխության կարևորագույն ձեռքբերումը Հայաստանի Հանրապետության քաղաքացու արժանապատվության վերանվաճումն էր: Ես երջանիկ եմ ու հպարտ, որ ՀՀ քաղաքացին այսօր կարող է հանգիստ խղճով ընտրել իշխանություն, վերահսկել նրա գործողությունները և ցանկացած պահի հեռացնել նրան: Հեղափոխության առաջին փուլը մենք ավարտել ենք: Նկատի ունենալով բարեփոխումները, կարող ենք ասել, որ երկու տարվա ընթացքում առանձին ոլորտներում մեծ փոփոխություններ են տեղի ունեցել»,- նշեց Մխիթար Հայրապետյանը:
Մեր զրուցակիցը նաև նկատեց, որ, անշուշտ, այս ընթացքում եղել են նաև թերացումներ. «Բայց դա անխուսափելի էր այն ժառանգության պայմաններում, որը մենք ստացել ենք»:
Անդրադառնալով պնդումներին, թե անհրաժեշտ է քաղաքական գնահատական տալ նախկին համակարգին, Մխիթար Հայրապետյանը նշեց, որ առանց քաղաքական գնահատական տալու հնարավոր չէր լինի հեղափոխություն իրականացնել: «Հեղափոխության փաստն, ինքնին, քաղաքական գնահատական է անցյալին… Այսօր հիմնական անելիքները իրավական տիրույթում են: Տասնյակ հազարավոր քրեական գործեր են հարուցվել վերջին տարիներին և ավելի քան հարյուր միլիոն դոլար է վերադարձվել վերոնշյալ գործերի շրջանակում»:
Մ. Հայրապետյանի խոսքով՝ ընդդիմադիր որոշ շրջանակներ մոլորության մեջ են:
Մանրամասն՝ տեսանյութում:
