«Մշակույթը հարցեր է բարձրացնում մարդու մեջ, և մարդը սկսում է ձևավորվել նորովի… Արվեստը կարողանում է թև տալ, մղել ավելի լավին ձգտելու: Արվեստը սատանայից դեպի Աստված տանող ճանապարհն է»,- «Առաջին լրատվական»-ի հետ զրույցում այս մասին ասաց դերասանուհի, Սոս Սարգսյանի անվան Համազգային թատրոնի գեղարվեստական ղեկավար Նարինե Գրիգորյանը:
Ինչպե՞ս կփոխվի հասարակությունը կորոնավիրուսից հետո: Նարինե Գրիգորյանի խոսքով՝ մարդիկ կկարոտեն իրար և կսկսեն ավելի շատ գնահատել անմիջական շփումը. «Մարդիկ չպետք է ընկճվեն, այլ պետք է սկսեն վերանայել իրենց ապրելակերպը, այն ռիթմը, որով ապրում էինք՝ 21-րդ դարն էր ստիպում՝ չէինք զգում կյանքը, բնությունը. գուցե սա իսկապես վերանայելու, վերագնահատելու և բնության հետ կապը վերահաստատելու հրաշալի հնարավորություն է»:
Կորոնավիրուսը հարվածում է ոչ միայն մարդկանց, այլ նաև պետություններին՝ վնաս հասցնելով հատկապես թույլ օրգանիզմներին. ինչպե՞ս է դիմակայում մեր հասարակությունն այս փորձությանը: Ի պատասխան այս հարցի՝ Նարինե Գրիգորյանը նշեց. «Ինձ դուր է գալիս հոգու ընդլայնումը, երբ հասկանում ես, որ ինչ տեղի է ունենում մոլորակում, կապված է քեզ հետ և դու պատասխանատու ես… Մեր ժողովուրդը ավելի հեշտ է տանում ինքնամեկուսացումը, ուրախանում եմ, որ փոխադարձ օգնության պատրաստակամություն կա: Մեր ժողովուրդը տեսել է Ցեղասպանություն, պատերազմներ, արդեն անցել է դժվարություններով, գիտի՝ ինչ անել… Եթե ընտրելու լինեի՝ պատերազմ, թե կորոնավիրուս, միանշանակ կընտրեի կորոնավիրուս… Մեր գենի մեջ կա միասնականությունը: Ծանր պատմություն ապրած ազգերն արդեն իմունիտետ ունեն… Կարևոր է, որ մարդը վերագտնի այս երկիր մոլորակի վրա իր գոյության ամենակարևոր իմաստը՝ դառնալ ավելի լավը, գնալ դեպի Սերը»:
Մանրամասն՝ տեսանյութում: