Այսօր զբոսաշրջային ընկերությունների ղեկավարներն ու աշխատակիցները բողոքի ակցիա էին իրականացնում։ Նրանք Կառավարությունից խնդրում են աջակցության այնպիսի ծրագրեր, որոնցվ միջոցով հնարավոր կլինի հաղթահարել այս ճգնաժամը։ Տուրիստական ընկերությունների ներկայացուցիչները իրենց հետ բերել էին տուրիստական թանկարժեք ավտոբուսները, որոնց ձեռք են բերել վարկային միջոցների հաշվին՝ ուղևորությունները զբոսաշրջիկների համար ավելի հարմարավետ դարձնելու նպատակով։
Ընկերությունների ներկայացուցիչները Կառավարությունից խնդրում են գոնե 1 տարով սառեցնել վարկային պարտավորությունները, այնպիսի աջակցության ծրագրեր մշակել, որոնք կօգնեն առաջիկա մեկ տարում կայուն վիճակ պահել ոլորտում։ Ոլորտի ներկայացուցիչների խոսքով, հակառակ դեպքում, Հայաստանը 20 տարի շարունակ կառուցած տուրիզմի ոլորտը կկորցնի։
Տուրիզմի հայկական ֆեդերացիայի նախագահ Մեխակ Ապրեսյանը «Առաջին լրատվական»-ի հետ զրույցում ասաց, որ իրենց ներկայացրած առաջարկությունները Կառավարությունը քննարկում է, հույս ունեն դրական պատասխան ստանալ։ Հիշեցնենք, որ նախկինում ևս անդրադարձել էինք ոլորտի խնդիրներին, որոնք պայմանավորված են կյորոնավիրուսային համավարակով։ Ապրեսյանի խոսքով՝ ոլորտը միլիոնավոր դոլաների կորուստ է ունենալու ու սնանկացումներն անխուսափելի կլինեն։
Մեզ հետ զրույցում Armenian bus ընկերության ղեկավարը նշեց, որ իրենք այս տարի արդեն պլանավորած ունեին, թե քանի զբոսաշրջիկ պետք է դիմավորեին Հայաստանում։ «Մենք Թեհրանից 4000 զբոսաշրջիկ պետք է ունենայինք, նրանց դիմավորեինք, աշխատեինք իրենց հետ։ Բայց հիմա ոչինչ չկա։ Մենք խնդրում ենք Կառավարությանը, բանկերին, աջակցել այս իրավիճակում ոլորտին»,- նշեց մեր զրուցակիցը։
Մանրամասները՝ «Առաջին լրատվական»-ի տեսանյութում
