Դոմինիկյան Հանրապետությունից 5 ուսանողներ երեք հարյուր ժամ շարունակ բարձրաձայն ընթերցել են առանց ընդմիջման: Այս մասին հաղորդում է Associated Press գործակալությունը: Սա թույլ է տվել ուսանողներին հայտնվել Գինեսի ռեկորդների գրքում, սակայն նրանք դեռ շարունակում են կարդալ և մտադիր են ավարտել ընթերցանությունը շաբաթ օրը, երբ կլրանա 365 ժամը:
Ուսանողները սկսել են կարդալ հուլիսի 7-ից: Նրանք բարձրաձայն հերթով ընթերցում են` փոխարինելով մեկը մյուսին բարձրախոսի մոտ: Նրանք կարդում են իրենց երկրի նախկին նախագահ Խուան Բոշի ստեղծագործությունները, որը հայտնի պատմաբան և գրող է եղել: Այս ակցիային ուսանողները նախապատրաստվել են 2 տարվա ընթացքում: Նրանցից յուրաքանչյուրը օրական երկու ժամ ընթերցանությամբ են զբաղվել, որպեսզի կարողանան մարզել ձայնալարերը:
Նրանք հույս են հայտնել, որ իրենց քայլը կխթանի ընթերցանությունը երիտասարդների շրջանում: Բարձր և անընդհատ ընթերցանության նախորդ ռեկորդը սահմանվել է Մայամիում 2009 թ. և տևել է 240 ժամ:
