Անազատության մեջ գտնվող երկրորդ նախագահ Քոչարյանի թիմը շարունակում է քարոզչական տիրույթի պայքարը։ Տվյալ հոդվածում քննարկվող թեման նոր չէ, բայց ինչպես ասում են՝ մեկ անգամ ավելի փորձելը վնաս չի տա։ Չնայած Մոսկվայից պաշտոնական մակարդակով հնչող հավաստիացումներին, Ռ. Քոչարյանի գրասենյակի ղեկավար Վիկտոր Սողոմոնյանը «5-րդ ալիք»-ի եթերում հերթական անգամ հայտարարել է, թե Ռոբերտ Քոչարյանի կալանքը հսկայական նշանակություն ունի հայ-ռուսական հարաբերությունների համար։
«Ես հուսով եմ, որ հարաբերությունները կպահպանվեն, քանի դեռ այս կնճիռները վերացված չեն, բայց ես չեմ կարող երաշխավորել, որ այդպես կլինի նաև հետագայում։ Ամեն ինչ չափ ու սահման ունի»,- ասել է Սողոմոնյանը։
Քաղաքական մեկնաբան Արմեն Բաղդասարյանն «Առաջին լրատվական»-ի հետ զրույցում կարծիք հայտնեց, որ Քոչարյանի կալանքի հարցը մեր արտաքին քաղաքականության վրա անդրադարձ չի ունենում. «Շատ ցավալի է, որ Վիկտոր Սողոմոնյանը հանդես է գալիս Ռուսաստանի պաշտպանության դիրքերից և ոչ Հայաստանի, չնայած ինքը, կարծես, ՀՀ քաղաքացի է։ Եվ երկրորդ՝ Ռուսաստանը չափազանց լուրջ երկիր է, որպեսզի իր ռազմավարական դաշնակից Հայաստանի հետ հարաբերությունները կարգավորի միջանձնային հարաբերությունների մակարդակով։ Իհարկե, միջանձնային հարաբերությունները կարևոր են, բայց պետությունների միջև ռազմավարական շահերն ու հարաբերությունները շատ ավելի կարևոր են»։
Բաղդասարյանն ընդգծեց՝ Ռուսաստանը պետք է հաշվի առնի, որ Հայաստանն օրենքի երկիր է, ու օրենքի առաջ բոլորը հավասար են. «Ուստի Ռուսաստանը պետք է հարգի Հայաստանի այդ դիրքորոշումը, ու հարաբերությունները պետք է կարգավորվեն միջպետական և ոչ միջանձնային շահերը հաշվի առնելով»։
Մեր զրուցակցի դիտարկմամբ՝ Վիկտոր Սողոմոնյանը ներքաղաքական նպատակներով է նման հայտարարություն անում. «Չեմ կարծում, թե Ռուսաստանում կիսում են նրա դիրքորոշումը, կամ ընդհանրապես Ռուսաստանում նման կարծիք կա։ Նա պարզապես փորձում է Ռուսաստանով մեզ վախեցնելով՝ ճնշում գործադրել ՀՀ իշխանությունների վրա կամ հասարակության մեջ այդպիսի տպավորություն ստեղծել։ Եվ, այո՛, սա նման է շանտաժի»։
Քաղաքագետ Լևոն Շիրինյանի դիտարկմամբ՝ Ռուսաստանի համար գործն ինչ-որ չափով է կարևոր. «Հիմա տվյալ անձը դրսից տղա է կանչում, հայ ազգն իր համար Տիզբոն է, դեմ է ՀՀ ինքնիշխանության ամրապնդմանը։ Հայաստանում հեղափոխություն եղել է, որ երեք նախագահների ինքնիշխանության հանձման կուրսը կասեցվի ու անկախությունը ամրապնդվի։ Այս պահին մենք առաջնորդվում ենք մեր սրբազան՝ անկախության ամրապնդման իրավունքով, մեր ինքնիշխանությունը սակարկման ենթակա չէ։ Արդարադատություն է կիրառվում երկու նախկին նախագահների հանդեպ, ու Հայաստանը այդպիսով գնում է հայրենիքի վերականգման ճանապարհով»,- «Առաջին լրատվական»-ի հետ զրույցում ասաց նա։
Ըստ մեր զրուցակցի՝ հինգերորդ շարասյունը չպետք է ազդի Հայաստանի ներքաղաքական ու արտաքին քաղաքական զարգացումների վրա. «Ռուսական կողմը սա պետք է հասկանա ու Հայաստանի հետ միջանձնային հարաբերությունները, որը միջնադարի սովորություն է, պետք է փոխարինի միջպետական հարաբերություններով։ Ես խնդիր չեմ տեսնում։ Գողապետության ոչնչացումը պերմանենտ գործընթաց է և պետք է շարունակվի»։
