«Ես խնդիրների մասին հիմա չէ, որ խոսում եմ. այդ մասին բարձրաձայնել եմ դեռևս 2013թ-ին, երբ «Արմավիա» ընկերությունը հայտարարեց իր սնանկության մասին: Իմ հետազոտությունների ոլորտում անձինք չեն, ես խոսում եմ համակարգում առկա խնդիրների, դրանց պատճառների մասին և քայլեր եմ առաջարկում, թե ինչպես հաղթահարել խնդիրները»,- «Առաջին լրատվական»-ի հետ զրույցում այս մասին ասաց ՀՀ վարչապետի նախկին խորհրդական Հակոբ Ճաղարյանը:
Օրերս նա իր ֆեյսբուքյան էջում հանդես էր եկել հայտարարությամբ՝ նշելով, որ զբաղեցրած պաշտոնից հրաժարվել է «քաղաքացիական ավիացիայի հանդեպ ցուցաբերվող կործանիչ, քայքայիչ և ապապետական մոտեցումների պատճառով»: Մեզ զրուցակիցը պարզաբանեց, որ իր կարծիքով քաղավիացիայի նկատմամբ այդպիսի վերաբերմունք է ցուցաբերվել՝ սկսած 90-ականներից. «Դա եղել է Լ. Տեր-Պետրոսյանի օրոք և շարունակվել հաջորդ երկու նախագահների կառավարության օրոք, և այդ վերաբերմունքը վերջին երկու տարվա ընթացքում գլոբալ փոփոխություններ չի կրել, ինչը և իմ հրաժարականի գլխավոր առիթը հանդիսացավ»:
Հակոբ Ճաղարյանի դիտարկմամբ՝ Հայաստանի ավիացիոն իշխանությունները իրենց պարտականությունները չեն կատարել: «Ես իմ պաշտոնավարման մեկ տարվա ընթացքում իմ խորհուրդները զեկուցագրերի տեսքով ներկայացրել եմ վարչապետին: Իմ նպատակը եղել է խնդիրների բարձրաձայնումը՝ ելնելով հանրային շահերից և պետական օգուտներից: Իմ մտահոգությունը ոչ թե անձանցով է պայմանավորված, այլ միայն և միայն համակարգի հանդեպ իմ վերաբերմունքով»:
Հակոբ Ճաղարյանի խոսքով՝ ՀՀ քաղաքացիական ավիացիայի կոմիտեի վերաբերյալ ամենադիպուկ գնահատականը տվել է ԵՄ ավիացիոն անվտանգության գործակալությունը. «Զեկույցում զետեղված են բոլոր թերությունները, որոնք ցանկացած երկրի ավիացիոն իշխանություններ պարտավոր էին կատարելու և չեն կատարել: Ես չեմ հեռանա պրոֆեսիոնալ աուդիտորների կարծիքից: Ընդ որում՝ այդ թերությունների մասին ես առաջարկություններ եմ արել… ՀՀ ավիացիոն իշխանությունների վարկանիշը տանում է դեպի եվրոպական սև ցուցակ»:
«Քաղավիացիան տնտեսության կարևոր ոլորտներից է, Հայաստանի համար զարգացած, մրցակցային ավիացիոն շուկա ունենալը հրամայական է»,- նշեց վարչապետի նախկին խորհրդականը: Նա նաև ընդգծեց. «Նիկոլ Փաշինյանի տակ երկու «ռումբ» է դրված՝ առաջինը խտրական մոտեցումներն են, երկրորդը՝ ավիացիոն իշխանությունների՝ միջազգային օրենքներին ոչ համապատասխան կառավարումն է»:
Մանրամասն՝ տեսանյութում:
