ՀՀ շրջակա միջավայրի նախարարությունը քննարկման է ներկայացրել մի նախագիծ, համաձայն որի՝ մի շարք գետերում կարգելվի փոքր հիդրոէլեկտրակայանների կառուցումը։ Նախագծի համաձայն՝ հանրապետության Կարմիր գրքում գրանցված կամ տարածքին բնորոշ՝ էնդեմիկ ձկնատեսակների ձվադրավայրեր հանդիսացող կամ դերիվացիոն խողովակներով 40 տոկոս և ավելի ծանրաբեռնված գետերում կարգելվի փոքր ՀԷԿ-երի կառուցումը։ Այդ գետերն են՝ Որոտանը, Որոտան գետի Դալի վտակը, Եղեգիսը, Եղեգիս գետի Կարակայա վտակը, Կարակայա վտակի Այասա վտակը, Ազատ գետի Գողթ վտակը, Դեբեդ գետի Կիստում վտակը և Ոսկեպար գետը։
ՀՀ բնապահպանության նախկին նախարար, բնապահպան Կարինե Դանիելյանն այդ որոշումը համարում է ճիշտ։
«Մի կողմից՝ միջազգային հանրությունը փոքր ՀԷԿ-երը, առհասարակ՝ ՀԷԿ-երի կառուցումը դրական է ընկալում։ Որտեղ ՋԷԿ-եր չեն լինում, փոքր ՀԷԿ-երը վնաս չեն տալիս, բայց նայած երբ, նայած որտեղ, նայած ինչպես են կառուցվում դրանք։ Այնպես, ինչպես ՀԷԿ-երը կառուցվել են Հայաստանում, մեր գետերի վրա, որոնք միշտ ջրի պակաս ունեն, շատ հաճախ լինում է, որ սանիտարական հոսք տեղի չի ունենում։ Ամբողջ ջուրն օգտագործվում է ՀԷԿ-ում, ձկները չեն կարողանում ապրել այդտեղ, ամբողջ էկոհամակարգը վերանում է։ Եվ հասարակական կազմակերպությունները վաղուց բարձրաձայնում են այդ մասին, հատուկ ուսումնասիրություններ են անցկացրել, գիրք են հրատարակել»,- «Առաջին լրատվական»-ի հետ զրույցում ասաց բնապահպանը։
Կարինե Դանիելյանը հավելեց, որ արդեն շատ ՀԷԿ-եր են կառուցվել, այդ գետակները ջրի պակաս ունեն, հատկապես սեզոնային ջրի պակաս ունեն, ուստի ջուրը ՀԷԿ-երի համար լրացուցիչ օգտագործել չի կարելի։
«Այդ նախագիծը վաղուց պետք է լիներ, որովհետև բավականին վնաս է հասցվել։ Հասարակական կազմակերպություններն այդ մասին վաղուց էին հայտարարում, բարձրաձայնում։ Իհարկե, ՀԷԿ-երը հարակից փոքր բնակավայրերին են սպասարկում, սակայն այն վնասը, որ հասցնում են, շատ մեծ է։ Ե՛վ նախարարությունը, և՛ անկախ փորձագետները, և՛ հասարակական կազմակերպություններն ուսումնասիրություններ են արել, կուտակվել են բավականին շատ նյութեր։ Մենք հավանություն ենք տվել այն աշխատանքներին, որն իրականացրել են մյուս ՀԿ-ները, միացել ենք իրենց առաջարկներին»,- նշեց մեր զրուցակիցը։