Շատերի կարծիքով՝ կորոնավիրուսի համաճարակով պայմանավորված՝ ճգնաժամը նոր խթան կհանդիսանա այլ ճգնաժամերի համար՝ տնտեսական, ֆինանսական, մշակութաբանական, հոգեբանական: Թեմայի շուրջ «Առաջին լրատվական»-ի հետ զրույցում հոգեբան Սեդա Վարդանյանը նշեց, որ ցանկացած երևույթ, որը կապված է մարդու բնականոն կյանքի փոփոխության հետ, առավել ևս եթե դա կապված է գլոբալ խնդիրների հետ, կարող է հանգեցնել որոշակի խնդիրների, և հոգեբանորեն պետք է պատրաստ լինել որոշակի արժեզրկումների, ֆինանսական խնդիրների: Հոգեբանի կարծիքով՝ առաջիկայում արժեհամակարգային փոփոխություններ կլինեն:
«Հասարակությունը գնում էր սպառող լինելու և հաճույք որոնելու ուղղությամբ և ոչ դեպի սեփական ես ու կյանքի իմաստին նայելու ուղղությամբ: Այսօր հենց սա է խնդիրը՝ ով եմ ես, ինչով եմ զբաղվում, ինչ կարող եմ անել հասարակության համար: Չինաստանը երբ օգնություն էր ուղարկել Իտալիա, կոնտեյներների վրա գրված էր Սենեկայի խոսքը. «Մենք մի ծովի ալիք ենք, մի այգու ծաղիկ ենք», մարդասիարական այս ժեստը ցույց է տալիս, որ խոր ճգնաժամի ժամանակ մարդը դեռ մարդ է աշխարհում իր ապրումակցմամբ: Հուսամ, որ փոփոխությունները կգնան դեպի համագործակցություն և ինքնաակտուալիզացիա: Փոփոխություններ կլինեն, իսկ այսօր մենք դեռ ընթացքի մեջ ենք, իմաստավորում ենք իրավիճակը ներսից: Հուսամ՝ սպառողից կվերածվենք արարողի»,- նշեց Սեդա Վարդանյանը:
Հոգեբանի կարծիքով՝ այս համաճարակային իրավիճակը հնարավորություն է տալիս հասկանալու, որ կենդանի հաղորդակցումը այն շքեղությունն է, որից լիովին չենք օգտվել, և ժամանակն է, որ համաճարակի հաղթահարումից հետո ավելի շատ շփվենք և ապրումակցենք: «Այս համավարակը դադարեցրեց հակամարտությունները. ցավը մարտահրավեր է դնում՝ ինչքանով կարող ես փոխվել, և դա վերաբերում է նաև ազգերին: «Կրակը» մեկին թրծում է, մյուսին՝ ծռմռում՝ դարձնում է տագնապային, ապակառուցողական: Դա ընտրություն է: Մենք, որպես հասարակություն, փյունիկի պես հառնող, վերածնվող ենք»,- նկատեց մերզ զրուցակիցը:
Մանրամասն՝ տեսանյութում:
