ԱՄՆ նախագահ Դոնալդ Թրամփը և Պետդեպարտամենտի ղեկավար Մայք Պոմպեոն հինգշաբթի մեղադրել են ԱՀԿ-ին՝ կորոնավիրուսի շուրջ ստեղծված ճգնաժամի ընթացքում սխալների համար:
«ԱՀԿ-ն չկարողացավ անել այն, ինչ իրենից սպասում էին բոլորը», – ասել է Պոմպեոն Սպիտակ տան ճեպազրույցի ժամանակ: Միևնույն ժամանակ, նա ասել է, որ համաձայն է Թրամփի այնդիրքորոշման հետ, որով առաջարկել է մտածել այն մասին, թե ապագայում ինչքանով պետք է ֆինանսավորվի այդ կազմակերպությունը: Միևնույն ժամանակ, պետքարտուղարը շեշտել է, որ այժմ ժամանակը չէ մտածել ԱՀԿ ղեկավարին փոխելու մասին:
Իր հերթին, Թրամփը նույն ճեպազրույցի ժամանակ ասել է, որ անցյալ տարի ԱՄՆ-ը վճարել է ԱՀԿ-ին 452 միլիոն դոլար, իսկ Չինաստանը ՝ ընդամենը 42 միլիոն դոլար: Նախորդ օրը նա այս կազմակերպությունն անվանել է պրո-չինական:
Թրամփը կրկնել է, որ ինքը կմտածի ԱՀԿ-ի հետագա ֆինանսավորման մասին: «Մենք կքննարկենք այս հարցը և կորոշենք, թե ինչ է պետք անել … ԱՀԿ-ում շատ սխալներ են թույլ տվել», – ասել է ԱՄՆ նախագահը:
Նախօրեին Թրամփն արդեն հայտարարել էր, որ նպատակ ունի վերանայել ԱՀԿ-ի ֆինանսավորումը: Մասնավորապես, նա ենթադրել է, որ կազմակերպությունը ուշ է նախազգուշացրել համաշխարհային հանրությանն այն մասին, թե որքան վտանգավոր է COVID-19 վիրուսը:
Բացի այդ, Թրամփը պատասխանել է ԱՀԿ գլխավոր տնօրեն Թեդրոս Ադհանոմ Գեբրիեսուսի քննադատությանը, որով նա հայտարարում էր ճգնաժամի քաղաքականացման անթույլատրելիության մասին:
«Հենց նա է քաղաքականացնում ճգնաժամը», – ասել է ԱՄՆ նախագահը: Թրամփը բացատրել է, որ ճգնաժամի սկզբում, չգիտես ինչու, ԱՀԿ-ն շատ որոշումներ կայացրեց հօգուտ Չինաստանի ՝ փորձելով համոզել համաշխարհային հանրությանը, որ անհրաժեշտ չէ կորոնավիրուսի տարածման դեմ վճռական միջոցներ ձեռնարկել: «Ամեն ինչ շատ չինամետ էր», – ասել է Թրամփը: