Ռուսաստանում և Հայաստանում բիզնես հիմնելու և վարելու խոչընդոտները նույնն են՝ վարչարարություն, մենաշնորհներ և օլիգարխներ, իսկ դրանք հաղթահարելու համար հարկավոր է քաղաքական կամք: Այսօր «Նովոստի» միջազգային մամուլի կենտրոնում «Կապիտալների փախուստ՝ հետխորհրդային տարածության ֆենոմենը» թեմայով Երևան-Մոսկվա տեսակամուրջի ժամանակ նման համոզվածություն հայտնեց ռուսական բանկերի միության վերլուծական բաժնի փոխղեկավար Սերգեյ Գրիգորյանը:
Նրա խոսքով, 1998 թվից անբարենպաստ բիզնես միջավայրի պատճառով Ռուսաստանից սկսել է արտահոսել կապիտալը: 2006-2007 թթ. որոշ չափով կապիտալի ներհոսք գրանցվեց, սակայն համաշխարհային տնտեսական ճգնաժամից հետո կրկին սկսվեց արտահոսք. 2009 թ. Ռուսաստանից դուրս է բերվել 44 մլրդ դոլար, 2010-ին՝ 27 մլրդ դոլար, իսկ, ըստ կանխատեսումների, ընթացիկ տարում Ռուսաստանից կապիտալի արտահոսքը կկազմի 35 մլրդ դոլար։
«Բիզնեսը գնում է այնտեղ, որտեղ կա բարենպաստ միջավայր»,- ասաց Ս.Գրիգորյանը՝ նշելով, որ հիմնականում հեռանում է փոքր ու միջին բիզնեսը:
Նա նշեց, որ 182 երկրների շարքում Ռուսաստանը գտնվում է 120-րդ տեղում՝ ըստ բիզնես միջավայրի դյուրինության: Ս.Գրիգորյանի խոսքով, օրենսդրական կարգավորումների տեսակետից Հայաստանը ավելի մոտ է միջազգային և եվրոպական չափանիշներին, քան Ռուսաստանը, քանի որ փոքր երկրներն ավելի հեշտ են ադապտացվում:
ՌԴ բանկերի միության ներկայացուցչի կարծիքով՝ փոքր և միջին բիզնեսի արտահոսքը կանխելու համար հարկավոր է բարելավել բիզնես միջավայրը և ապահովել իրավական պաշտպանվածություն:
