Հայաստանում կորոնավիրուսով վարակի ևս 3 դեպքի հայտարարությունից հետո վերստին աշխուժացել են կոչերը սահմանադրական հանրաքվեն չեղարկելու մասին: Թեև այստեղ ակնառու են քաղաքական շահառուների շրջանակները, այն էլ ոչ միայն նախկին իշխանության տիրույթից, այդուհանդերձ անհնար է չընդունել, որ տեղեկատվաքարոզչական միջազգային հարթությունում առկա պաշտոնական հղումները առնվազն հիմնավոր են դարձնում հարցի դիտարկելը:
Թեմայի շուրջ «Առաջին լրատվական»-ի հետ քննարկմանը մասնակցեցին կառավարման հարցերի փորձագետ Սերոբ Անտինյանը, քաղաքագետներ Արմեն Վարդանյանը և Արմեն Հովհաննիսյանը:
Անդրադառնալով դիտարկմանը, որ կորոնավիրուսը կարծես թե դառնում է ներքաղաքական մթնոլորտի հիմնական խաղաթուղթ, Սերոբ Անտինյանը նշեց. «Այո, սա մի երևույթ է, որն ընդգրկել է ամբողջ աշխարհը և չէր կարող նաև չազդել մեր ներպետական կյանքի վրա և չբերեր քաղաքական դրսևորումների: Հանրաքվեն չի չեղարկվի, բայց մեծ է հավանականությունը, որ այն կհետաձգվի: Այն իրավիճակը, որ կա միջազգային ասպարեզում, իրապես անհանգստացնող է, այդ համաճարակը կարող է լրջագույն հետևանքներ ունենալ մեզ համար»:
Արմեն Հովհաննիսյանը հավելեց, որ հնարավոր է ցանկացած սոցիալական, հանրային, քաղաքական զանգվածային դրսևորում ժամանակավորապես սառեցվի. «Եվ դա ճիշտ կլինի»: «Կորոնավիրուսը շատ ավելի մեծ ազդեցություններ ունի, քան զուտ առողջական, բժշկական ազդեցությունն է»:
Անդրադառնալով դիտարկմանը, որ մեր պարագայում այս ամենին գումարվում է հանրաքվեի հանգամանքը, Արմեն Վարդանյանը կարծիք հայտնեց, որ կորոնավիրուսի ֆոնին հնարավոր է քաղաքական տրանսֆորմացիաներ լինեն. «Վատագույն սցենարի դեպքում, եթե առաջիկա օրերին մեզ մոտ էլ զոհեր լինեն, վստահ եմ, ընդդիմությունը դա կօգտագործի իշխանությանը խփելու համար»:
Սերոբ Անտինյանի դիտարկմամբ՝ վարչապետի հրապարակած հանրաքվեի հռչակագիրն իր բովանդակությամբ անատամ փաստաթուղթ է և չի տալիս հստակ քաղաքական-իրավական գնահատական. «Այն պետք է լիներ ավելի ծավալուն և ավելի թիրախային»:
Մանրամասն՝ տեսանյութում: