Հայաստանը հիմնականում ներմուծում է ցիտրուսային մրգեր, խնձորի որոշ սորտեր, տանձ, սերկևիլ: Ազգային վիճակագրական ծառայության տվյալներով, 2010 թ-ին ՀՀ-ն արտահանել է 9 հզ. տոննա կամ 6.8 մլն դոլարի միրգ, ներմուծել՝ 32 հզ. տոննա կամ 43 մլն դոլարի: Գյուղատնտես Գառնիկ Պետրոսյանն «Առաջին լրատվականի» հետ զրույցում նշեց, որ այն պտղատեսակները, որ այստեղ լիուլի կան ու բավարարում են ներքին պահանջարկը, դրանք շատ քիչ են ներմուծվում:
Նա ներմուծման 32 հզ. տոննա ցուցանիշն անվանեց «մի քիչ առասպելական»:
Գ. Պետրոսյանի տվյալներով, Հայատանում միջինում 200 հզ. տոննայից ավելի պտուղ է արտադրվում, անգամ 300 հզ. տոննա, ինչը բավականին լուրջ թիվ է. «Փաստորեն, 1 շնչին 10 կգ միրգ է բաժին ընկնում: Կասկածելի է, թեև չեմ վիճարկում, եթե ԱՎԾ ցուցանիշներն են»:
Միաժամանակ, Գ. Պետրոսյանը հավատեց, որ արտահանման ծավալներն իրականում ավելի մեծ են, քան մաքսայինում հաշվառվում է: Բավակնաչափ մեծ քանակությամբ միրգ հանրապետությունից դուրս է բերվում ավտոմեքենաներով. «Յուրաքանչյուրը 50-100 կգ-ով տանում են, կամ ինքնաթիռներով ծիրանի սեզոնի ժամանակ ամեն մի ուղևոր 5-10 կգ-ով տանում է, և դա ոչ մի տեղ չի երևում: Արդյունքում դրանք լուրջ թվեր են կազմում:
Հատուկենտ մարդկ կան, որ ծիրան չեն տանում»,- ասում է մասնագետը՝ արտահանման ընդհանուր ծավալները գնահատելով մոտ 20 հզ. տոննա միրգ:
