Թուրքական Zaman թերթի փոխանցմամբ՝ Թուրքիայի վարչապետ Էրդողանը հայտարարել է, որ Անկարան լիովին կսառեցնի ԵՄ հետ հարաբերությունները, եթե 2012 թվականի ամռանը Կիպրոսի Հանրապետության կողմից ԵՄ նախագահության ստանձնման ժամանակ կիպրական խնդիրը կարգավորված չլինի։
Էրդողանի այս հնչեղ հայտարարությունն արվել է հուլիսի 20-ին Հյուսիսային Կիպրոսում թուրքական զորքերի ափհանման (թուրքական կողմն այն անվանում է «Խաղաղության շարժում») 37-ամյա տարեդարձի նախօրեին։
Էրդողանը նշել է. «Վեց ամիս մենք հետևելու ենք իրադարձությունների ընթացքին։ Եթե կիպրական հարցը չկարգավորվի, ապա ԵՄ հետ բոլոր հարաբերությունները կսառեցվեն։ Մենք չենք խոսի մի երկրի հետ, որին չենք ճանաչում»։
Էրդողանը նաև դեմ է արտահայտվել կիպրական հարցի կարգավորման գործընթացում ԵՄ միջամտությանը. «Մենք ԵՄ-ին չենք ճանաչում որպես Կիպրոսի հարցի զրուցակից։ ԵՄ-ը փորձում է այդ խնդիրը քաշել իր կողմ։ Իսկ մենք էլ ասում ենք, որ այդ խնդիրն ամբողջովին պետք է լուծվի ՄԱԿ-ի հարթակում»։
Հիշեցնենք, որ մոտ մեկ շաբաթ առաջ էլ ԵՄ-ին նույնատիպ սպառնալիք էր հասցեագրել Թուրքիայի արտգործնախարար Ահմեդ Դավութօղլուն։ Վերջինս դրա համար արժանացել էր ԵՄ ընդլայնման և եվրոպական հարևանության հարցերով եվրակոմիսար Շտեֆան Ֆյուլեի քննադատությանը, ով հայտարարել էր, որ ներկայումս այդպիսի հայտարարություններ անելու ժամանակը չէ։