Թուրքական Hürriyet Daily News and Economic Review թերթին տված հարցազրույցի ժամանակ Ադրբեջանի փոխարտգործնախարար Արազ Ազիմովն անդրադարձել է ղարաբաղյան հակամարտության կարգավորմանը.
«Հայաստանը «կարող» է Ադրբեջանին դրդել նոր պատերազմի։ Պատերազմի վերսկսման հարցում Հայաստանն «ավելի շահագրգռված» է, քան՝ Ադրբեջանը։ Հայաստանը «ցանկանում» է ձեռք բերել ավելի շատ արդարացնող հանգամանքներ՝ Ղարաբաղի «օկուպացման» համար, ինչի համար էլ նա սադրանքի համար հարմար առիթ է «փնտրում»։
Պատերազմի վերսկսումը հնարավոր է, սակայն այն կարող է սկսվել սադրանքից։ Մենք պատերազմ չենք ցանկանում։ Հայաստանի քաղաքական նպատակը հանդիսանում է Ադրբեջանից Լեռնային Ղարաբաղի անջատումը, սակայն մենք «երբեք» չենք հաշտվի դրա հետ»։
Ազիմովը քննադատել է նաև Մինսկի խմբի գործունեությունը. «Մենք տեսնում ենք, որ վերջին շրջանում Ռուսաստանն առաջատար դիրքեր է ստանձնել Մինսկի խմբում, մինչդեռ մյուս երկու համանախագահող երկրները՝ ԱՄՆ-ը ու Ֆրանսիան, հետ են մնացել։
Արդյունքում, վերջին 9 հանդիպումներն անցկացվել են Ռուսաստանի նախագահ Դմիտրի Մեդվեդևի նախագահությամբ։ Մենք ցանկանում ենք, որ ԱՄՆ-ը և Ֆրանսիան ավելի ակտիվ լինեն և հավասարակշռություն ստեղծեն Մինսկի խմբում։
Մինսկի խումբը ոչ մի այլ երկրի չի թողնում ներգրավել ղարաբաղյան հակամարտության կարգավորման գործընթացի մեջ։ Մենք գոհ չենք, որ գործընթացին չեն մասնակցում Թուրքիան ու Գերմանիան։ Բացի այդ, ո՛չ ՆԱՏՕ-ն, ո՛չ էլ ԵՄ-ը դեռևս որևէ ռազմավարություն չեն ցուցաբերել Հարավային Կովկասի նկատմամբ»։
