Հռոմի պապ Ֆրանցիսկոսը չի ողջունել գաղափարը, որ ամուսնացած տղամարդիկ քահանաներ լինեն, իսկ կանայք սարկավագ դառնան: Այդ մասին հայտնում է CNN-ը՝ հղում անելով Հռոմի պապի կողմից պատրաստված 32 էջանոց փաստաթղթին: Այս նախաձեռնությամբ հանդես է եկել Վատիկանի եպիսկոպոսների խորհուրդը:
Խորհուրդը հատուկ գաագաթաժողով է գումարել անցյալ տարվա հոկտեմբերին, այն տևել է երկու շաբաթ:
Խորհրդի կարծիքով՝ Ամազոնիայում ամուսնացած տղամարդկանց քահանայությունը լուծում կտար քահանաների սակավաթիվ լինելու խնդրին, իսկ կանանց սարկավագությունը կարող էր ընդլայնել նրանց իշխանությունը եկեղեցում:
CNN-ի փոխանցմամբ՝ Հռոմի պապի հայտարարությունը, որը հայտնի է որպես առաքելական ուղերձ, հիմնականում վերաբերում է Ամազոնիայի մշակութային և բնապահպանական խնդիրներին, բայց դրանց լուծման եղանակները գրեթե չեն նկարագրվում: Փաստաթուղթը ներառում է նաև Պապի հեղինակած արձակ բանաստեղծությունը՝ Ամազոնիայի վերաբերյալ նրա «մեծ երազանքի» մասին:
