Անշարժ գույքի շուկայում ներկայումս գների որոշակի աճ է արձանագրվում: «Առաջին լրատվական»-ի հետ զրույցում անշարժ գույքի շուկայի մասնագետ Դավիթ Հովհաննիսյանն այդ աճն անվանեց լիովին բնական և շեշտեց, որ դրանում «ճիշտ վարվող քաղաքականության» ոչ մի ազդեցություն չկա: Ըստ նրա, մինչ այժմ անշարժ գույքի շուկայի «հանդարտ» վիճակը պայմանավորված էր նրանով, որ ճգնաժամից հետո մարդիկ մտավախություն ունեին, չէին շտապում իրենց գումարներից հրաժարվել, իսկ այժմ շատ թե քիչ կայուն իրավիճակ է, և նրանք, ովքեր բնակարանի կարիք ունեն, ակտիվացել են:
«Անշարժ գույքի շուկայում կայունությունը նպաստում է գնորդների ավելացմանը»,- ասաց Դ. Հովհաննիսյանը՝ հավելելով, որ այս շուկայի «լոկոմոտիվը» Կենտրոն համայնքն է, որտեղից հետո աշխուժությունը տարածվում է մյուս համայնքներում:
Թե որքա՞ն կշարունակվի անշարժ գույքի շուկայի այս որոշակի ակտիվությունը՝ դժվար է ասել, առավել ևս արտագաղթի այս պայմաններում: Որոշ մասնագետների կարծիքով, ՀՀ-ում ճգնաժամի ազդեցությունն այս ոլորտում դեռ չի արտահայտվել և ամեն ինչ առջևում է՝ անկումն անխուսափելի է:
Նշենք, որ 2011 թ. մայիսին հանրապետությունում անշարժ գույքի նկատմամբ իրականացվել է 16,643 գործարք, որոնց քանակը 2011 թ. ապրիլի համեմատ աճել է 2.0%-ով, իսկ 2010 թ. մայիսի համեմատ՝ 23.1%-ով: Անշարժ գույքի օտարման գործարքների քանակի 39.1%-ն արձանագրվել է Երևան քաղաքում, իսկ օտարված անշարժ գույքի 37.1%-ը հանդիսանում են բազմաբնակարան բնակելի շենքերի բնակարանները: Երևան քաղաքում 2011 թ. մայիսին բազմաբնակարան բնակելի շենքերի բնակարանների, 1 քմ մակերեսի հաշվարկով, շուկայական միջին գները, 2011 թ. ապրիլի համեմատ, աճել են 0.2%-ով:
