ԱՄՆ նախագահ Դոնալդ Թրամփը հանդես է եկել «Երկրի իրավիճակի մասին» ամենամյա ուղերձով՝ խոսելով, մասնավորապես, տնտեսական հաջողությունների, առևտրային նոր համաձայնագրերի, երկրի ռազմական հզորության և համաճարակների դեմ պայքարի հաջող ընթացքի մասին:
Նրա խոսքով՝ Վաշինգտոնը «վերականգնում Է իր առաջատարությունն աշխարհում» և «վերստին պայքարում է հանուն ազատության իր կիսագնդում»: «Հենց այդ պատճառով է իմ վարչակազմը չեղյալ հայտարարել նախորդ վարչակազմի ձախողված քաղաքականությունը Կուբայի նկատմամբ», – ասել է ԱՄՆ-ի ղեկավարը: «Մենք պաշտպանում ենք ժողովրդավարության վերականգնման՝ կուբացիների, նիկարագուացիների և վենեսուելացիների հույսը»,- հավելել Է Թրամփը:
Ըստ Թրամփի՝ ամերիկյան տնտեսության վիճակն այսօր աննախադեպ բարվոք է: «Գործազրկության մակարդակը հասել է նվազագույն ցուցանիշի վերջին 50 տարում, 65 տարի տևած ընդմիջումից հետո Ամերիկան ավելի շատ էներգակիր է արտահանում, քան ներմուծում», – հայտարարել է ԱՄՆ ղեկավարը: Եզրափակելով՝ Թրամփը նույնիսկ առաջարկել է ընդունել մայրության արձակուրդի մասին օրենքը:
Այնուամենայնիվ, Սպիտակ տան ղեկավարը որոշել է չհիշատակել Սենատում իր իմփիչմենթի վերաբերյալ չորեքշաբթի կայանալիք քվեարկությունը:
Ի դեպ, ելույթը սկսվել է սկանդալով: Ավանդույթին հակառակ, Ներկայացուցիչների պալատի խոսնակ Նենսի Փելոսին պետության ղեկավարին չի ներկայացրել հետևյալ խոսքերով․ «Մեզ համար մեծ պատիվ է ողջունել Միացյալ Նահանգների նախագահին … »: Փոխարենը, դեմոկրատական առաջնորդը հակիրճ նշել է. «Միացյալ Նահանգների նախագահ Դոնալդ Թրամփ», բայց, այնուամենայնիվ, մեկնել է ձեռքը Սպիտակ տան ղեկավարին ողջունելու համար: Սակայն Թրամփը ցուցադրաբար անտեսել է Փելոսիի մեկնած ձեռքը: Իսկ ելույթի ավարտից հետո Փելոսին պատռել է նախագահի տպագիր ելույթը:
.@SpeakerPelosi tears up of State of the Union speech.#SOTU #SOTU2020 pic.twitter.com/sIpi4G7KsL
— CSPAN (@cspan) February 5, 2020
