Ռուբեն Հայրապետյանի պաշտպանը հայտարարել է, որ ոստիկանության քրեական հետախուզության վարչության դիմակավորված անձինք բերման են ենթարկել Հայրապետյանին, առանց հիմնավորման՝ ըստ պաշտպանի:
Այդ հաղորդագրությունը հիշեցնում է հունվարի 28-ին ոստիկանության նույն հատուկ ստորաբաժանման գործողությունը մի քանի գործիչների նկատմամբ, որոնք նախկին իշխող համակարգին առնչվող շրջանակներից են և գործունեություն են ծավալում իշխանությանը կոշտ քննադատության դաշտում՝ չվարանելով անգամ հայհոյախառն բառապաշարի կիրառման հարցում: Հունվարի 28-ի միջադեպը առաջացրեց մեծ աղմուկ, անգամ «Իմ քայլը» մեծամասնությունը ոստիկանապետի ժամանակավոր պաշտոնակատարի հետ զրույց ունեցավ: Ոստիկանապետի ԺՊ-ն հայտարարեց, որ գործողությունը կատարվել է օրենքի շրջանակում, օպերատիվ տեղեկատվության հիման վրա:
Այն, որ գործնականում նույն ոճով բերման է ենթարկվում նաև Ռուբեն Հայրապետյանը, վկայում է, որ ոստիկանության հունվարի 28-ի քայլը առնվազն ունեցել է քաղաքական իշխանության և մասնավորապես վարչապետի հավանությունը: Հակառակ պարագայում դժվար է պատկերացնել, որ հունվարի 28-ի աղմկոտ միջադեպի ոճով լիներ ոստիկանության նոր գործողություն, այն էլ՝ նախկին իշխող համակարգը ներկայացնող օդիոզ դեմքերից մեկի նկատմամբ:
Արդյոք դա թո՞ւյլ է տալիս խոսելու այն մասին, որ ոստիկանությունն այդ տեսանկյունից ձեռնամուխ է եղել ակցիաների կամ գործողությունների շարքի, և ով է հաջորդն այդ շարքում:
Ակնառու է, որ նոր գործողությունը, վկայելով դրան գնալու քաղաքական բարձր հավանության մասին, գործնականում կրում է պատժիչ բնույթ և ցուցադրական պատժիչ բնույթ: Ըստ այդմ՝ առաջանում է երկու հարց: Մեկն իհարկե գործողությունների իրավաչափության, օրինականության հարցն է՝ անկախ, անշուշտ, այն հանգամանքից, թե քաղաքական ինչ հայացք կամ կողմնորոշում ունեցողի հանդեպ է այն կիրառվում: Եվ մյուսը հարցն է, թե ո՞րն է այդ գործողության հենց այդ ոճի կամ բնույթի բուն իմաստը:
Բանն այն է, որ եթե հունվարի 28-ի գործողությունը լիներ անարդյունավետ, ապա հազիվ թե ոստիկանությունը ստանար այդ ոճով ևս մի գործողության, աղմուկի ևս մի ալիք առաջացնող ռիսկ ենթադրող քայլի հավանությունը: Ըստ այդմ՝ եթե կա երկրորդ դեպքը, պետք է ենթադրել, որ հունվարի 28-ի գործողությունն այդուհանդերձ ծառայել է որոշակի նպատակի, որը, սակայն, դուրս է հանրային իրազեկվածության դաշտից, գոնե առայժմ:
Լուսանկարը՝ Armeniasputnik-ի
