«2019-ը ավարտեցինք լավ ցուցանիշով, այսօր մեր գերխնդիրն է 2020-ին տնտեսական զարգացումներ ապահովել», – այս մասին «Առաջին լրատվական»-ի հետ զրույցում ասաց Հայաստանի արդյունահանողների և գործարարների միության նախագահ Արսեն Ղազարյանը՝ անդրադառնալով դիտարկմանը, որ դեկտեմբերին տնտեսական ակտիվության բարձր ցուցանիշ է գրանցվել՝ 10,7 տոկոս: Մեր զրուցակցի խոսքով՝ անցած տարի էկոնոմ ռեժիմով աշխատելով՝ հսկայածավալ ներդրումներ են արվել:
Հարցին, թե արտահանումն ինչի՞ հաշվին է դեկտեմբերին աճել 13 տոկոսով, Ա. Ղազարյանը պատասխանեց. «Նոյեմբեր-դեկտեմբերին ամենամեծ ծավալներով են արտահանվում վերամշակված գյուղմթերքները, խմիչքը դեպի բոլոր շուկաներ, արտահանման ծավալների աճը ապահովվել է դրա հաշվին, բացի դրանից՝ արտադրության ոլորտի ծավալների աճ ունենք»:
Անդրադառնալով տնտեսության ոլորտի խնդիրներին՝ Հայաստանի արդյունահանողների և գործարարների միության նախագահն ընդգծեց. «Նախկինում երեք հիմնական խնդիր ունեինք՝ հավասար մրցակցություն, օրինականություն, մաքսային, հարկային ոլորտներում կոռուպցիա, իսկ այսօր հիմնական խնդիրը կառավարման մենեջմենթի դանդաղկոտության, քաշքշուկների հետ է կապված, ինչպես նաև կառավարչական համակարգի իներցիայի. շատերը հեղափոխական փոփոխություններին հոգեբանորեն չեն ընտելանում, մարդիկ, որոնք սովոր էին իրենց դիրքը չարաշահելով՝ լրացուցիչ եկամուտ ունենալ, հիմա չեն կարողանում, իսկ երիտասարդ, նոր կադրերը վերապատրաստման կարիք ունեն: Կրճատումներ կլինեն, և դա շատ ճիշտ կլինի արդյունավետ աշխատանքի համար»:
Մանրամասն՝ տեսանյութում:
