Ժնևում տեղի է ունեցել Հայաստանի և Ադրբեջանի արտգործնախարարներ Զոհրաբ Մնացականյանի և Էլմար Մամեդյարովի հանդիպումը: Հանդիպմանը մասնակցել են նաև ԵԱՀԿ Մինսկի խմբի համանախագահները և ԵԱՀԿ գործող նախագահի անձնական ներկայացուցիչը: Ի՞նչ թեզեր և մանիպուլյատիվ հայտարարություններ են հնչել հանդիպման վերաբերյալ, ի՞նչ ակնկալիքներ կան այս հանդիպումից: Թեմայի շուրջ «Առաջին լրատվական»-ի հետ քննարկման ընթացքում իրենց դիտարկումները ներկայացրին «Իմ քայլը» խմբակցության պատգամավոր Միքայել Զոլյանը և «Օրբելի» կենտրոնի փորձագետ, ադրբեջանագետ Տարոն Հովհաննիսյանը:
«Այս փուլում արտգործնախարարների հանդիպումից լուրջ սպասելիքներ չենք կարող ունենալ»,- ընդգծեց Միքայել Զոլյանը՝ հավելելով, որ դեռևս չի ստեղծվել բանակցություններում էական առաջընթացի համար անհրաժեշտ մթնոլորտ: «Հայկական կողմը բազմիցս խոսել է, որ կողմերին պետք է խաղաղության պատրաստել, բացառել ատելության քարոզչությունը և հանցագործների հերոսացումը: Բացի դրանից՝ գործընթացը պետք է ներառական լինի, այն է՝ պետք է բանակցություններին մասնակցեն Արցախի Հանրապետության ներկայացուցիչները»,- նշեց պատգամավորը հավելելով, որ, այնուամենայնիվ, արտգործնախարարների հանդիպումները օգտակար են և անհրաժեշտ:
«Որոշակի առաջընթաց ունենք. առանց Ստեփանակերտի չի կարող խնդիրը լուծվել. այս բանաձևն արդեն իսկ մտել է շրջանառության մեջ, և երբ բանակցությունները մտնեն բովանդակային փուլ, չի կարող որևէ որոշում կայացվել, որին Արցախը համաձայն չլինի»,- նշեց Տարոն Հովհաննիսյանը:
Մանրամասն տեսանյութում:
