Հոկտեմբերի 27-ի ոճրագործության զոհ Յուրի Բախշյանի այրու՝ Անահիտ Բախշյանի դատախազություն ուղարկված դիմումից հետո որոշում կայացվեց անջատված մասով նոր քննություն անցկացնել։ Ա. Բախշյանն այնուհետև բաց նամակ ուղղեց վարչապետ Նիկոլ Փաշինյանին և ԱԺ նախագահ Արարատ Միրզոյանին՝ նշելով, որ նոր քննության ընթացքում գործով տուժող պետք է ճանաչվի պետությունը, այսինքն՝ կառավարությունը՝ ի դեմս վարչապետ Փաշինյանի, և Ազգային ժողովը՝ ի դեմս նախագահ Արարատ Միրզոյանի։
Հոկտեմբերի 27-ի գործի վերաբացման անհրաժեշտության մասին մշտապես խոսել է «Հայրենիք ու պատիվ» կուսակցության նախագահ Գառնիկ Մարգարյանը։ Նրա կարծիքով՝ Մարտի 1-ի գործը թեպետ կարևոր է, և անպայմանորեն պետք է բացահայտվեն դրա կազմակերպիչներն ու պատասխանատուները, պետք էր սկսել Հոկտեմբերի 27-ից. «Եթե այդ շղթան բացվեր, այսօր մյուս ոճրագործության՝ Մարտի 1-ի մասնակիցները կլռեին։ Ես դրական եմ համարում։ Եթե դա չի բացահայտվում, ապա մեր պատմության նորագույն էջերում մի սև ծանր էջ է մնում, և դա սերունդներին լավ բան չի հիշեցնելու։ Այո՛, Մարտի 1-ի համար պետք է պատասխան տան, բայց պետք էր սկսել Հոկտեմբերի 27-ից, արմատներն այնտեղ են գնում»։
Մարգարյանը նաև շեշտեց՝ քաղաքական իրադարձությունների ներկայիս փուլում իրենք որոշում են կայացրել տևական ժամանակ հրապարակային կարծիքներով հանդես չգալ, այդուհանդերձ նշեց՝ ողջունում է նոր քննություն անցկացնելու որոշումը։ Մեր այն դիտարկմանը, թե իրավապահ համակարգի այս վիճակում արդյոք հնարավոր կլինի օբյեկտիվ քննություն անցկացնել, մեր զրուցակիցը պատասխանեց. «Ամեն ինչ հնարավոր է ցանկության դեպքում»։
Գառնիկ Մարգարյանը չի կարծում, թե ոճրագործության թելերը կարող են տանել այլ պետություն՝ Ռուսաստան, բայց և նշում է, որ մենք չպետք է վախենանք, թե ուր կտանեն այդ թելերը՝ լինի դա Ռուսաստան, Արևմուտք, թե Եվրոպա. «Իմ սուբյեկտիվ կարծիքն այն է, որ Ռուսաստանն այդ հարցում բացարձակ խառնված չէ։ Իմ կարծիքով՝ Ռուսաստանին բացարձակ ձեռնտու չէր այդպիսի քայլի գնալ։ Հանգուցյալ, լուսահոգի Կարեն Սերոբի Դեմիրճյանը ոչ թե ռուսամետ էր, այլ Ռուսաստանի հետ ուներ բարիդրացիական հարաբերություններ, դեռ ուսանողական տարիներից նրա ընտանիքը, եղբայրն ու մյուսները կապված էին Ռուսաստանի հետ։ Նայեք, թե ումով էր շրջապատված Վազգեն Սարգսյանը՝ ռուսական գեներալներով, նախարարներով..․ սա նեղ անձնական խնդիր էր։ Եթե վերցնենք պետական խնդիրը, ապա ինչո՞ւ պետք է Ռուսաստանը փորձեր գլխատել մի ամբողջ ազգի, ազգի սերուցք, որոնք, այսպես թե այնպես, հակված էին և ունեին Ռուսաստանի հետ կապվածություն»։
Հոկտեմբերի 27-ի ոճրագործության մասին ուշագրավ տեղեկություններ էր բաց նամակի միջոցով փոխանցել պաշտպանության նախկին փոխնախարար Վահան Շիրխանյանը։ Վերջինս Ռոբերտ Քոչարյանին ուղղված բաց նամակում ուղղակիորեն նշել էր Մեղրիի տարբերակի փոխանակման մասին և նաև անդրադարձել էր այն բոլոր պատճառներին, որոնք հնարավոր դարձրին Հոկտեմբերի 27-ը։ «Առաջին լրատվական»-ի հետ զրույցում Շիրխանյանն ասաց, որ ծանոթ է Անահիտ Բախշյանի դիմումին և ողջունում է գործի վերաբացումը։ Այս փուլում դա ինչքանո՞վ արդյունավետ կլինի հարցին ի պատասխան, մեր զրուցակիցն ասաց. «Իհարկե պետք է վերաբացել գործը՝ անկախ ամեն ինչից։ Ես կարծում եմ, որ հնարավոր ու անհրաժեշտ է նոր քննությունը»։
Այն հարցին՝ արդյոք պե՞տք է գործով տուժող ճանաչվի կառավարությունն ու Ազգային ժողովը, Վահան Շիրխանյանն ասաց, որ դրանք իրավական հարցեր են, և առաջնայինը քննություն անցկացնելն է։
