Թուրքիայի սահմանադրական դատարանի ղեկավար Հաշիմ Կըլըչը «ստորություն» է համարել դատական իշխանություններին ուղղված՝ օբյեկտիվ չլինելու և քաղաքականացվածության վերաբերյալ մեղադրանքները, գրում է ITAR-TASS-ը:
«Մեր նպատակը ոչ թե խնդիրներ ստեղծելը, այլ դրանք լուծելն է: Բնական է, որ սահմանադրական դատարանի որոշումները կարող են հանգեցնել քաղաքական արդյունքների, քանի որ հիմնվում են սահմանադրության`քաղաքական փաստաթղթի վրա: Ստորություն է հայտարարելը, որ սահմանադրական դատարանը գործում է քաղաքական դրդապատճառներից ելնելով կամ էլ ժողովրդի շահերից չելնելով»,- ասել է Կըլըչը:
Նրա այս հայտարարությունը համարվում է պատասխան վարչապես Ռեջեփ Թայիփ Էրդողանին, որն ավելի վաղ ասել էր, թե «պարտավոր չէ հարգել դատարանի վճիռը», համաձայն որի` Twitter սոցիալական կայքի արգելափակումը խախտել է օրենքը: Վարչապետը նաև նշել է, որ նման վճիռները բխում են ոչ թե ժողովրդի, այլ «ամերիկյան ընկերությունների պաշտպանության շահերից»:
