«Ժողովրդավարական հայրենիք» կուսակցության նախագահ, նախկին քաղբանտարկյալ Պետրոս Մակեյանը դժվարանում է միանշանակ գնահատական տալ անցնող տարվա քաղաքական իրադարձություններին։
<Երկրորդ տարին է, որ մենք ազատագրվել ենք բանդայի ռեժիմից, բայց անցյալ տարվա համեմատ հույսը և հավատը, որ մենք ճիշտ ճանապարհով ենք գնում, շատ ավելի կասկածելի են։ Նախորդ տարում այդ վստահությունը շատ ավելին էր, և մենք վստահ էինք, որ նոր Հայաստանում ենք։
Այսօր, սակայն, հավասարակշռված վիճակ է․ հետ քաշող, հակահեղափոխական ուժերը և հեղափոխական ուժերը պահպանում են բալանսը։ Հատկապես մտահոգիչ է ազգային համերաշխության բացակայությունը, բանակի, ազգային անվտանգության հետ կապված կան խնդիրներ։ Մենք պոտենցիալ պատերազմի շեմին ենք, և բանակը պետք է ապահովի մեր անվտանգությունը։ Հատկապես, երբ Թուրքիան մտավ Սիրիա, մեր ազգային անվտանգությունը պետք է ավելի ապահովված լինի, իսկ դա հնարավոր է միայն գողացված գումարները վերադարձնելու ճանապարհով։ Մեզ մոտ այդ առումով վիճակը վատ է։ Գողերը, ավազակներն արտագաղթում են և շարունակում են արտագաղթել։ Բանակում շարունակվում են զոհեր լինել։ Իսկ այդ ֆոնին իշխանությունը դրսևորում է անհետևողականություն, ցոփ ու շվայտ կյանքի ձգտումներ։
«Ես իշխանություններից թեև սպասելիքներ չունեմ, բայց հույսս չեմ կտրել Նիկոլ Փաշինյանից։ Ժամանակին մտածում էի, որ ավելի լավ է լինեն անփորձ ջահելներ, քան՝ փորձված ավազակներ, բայց ջահելներից շատերը, պարզվեց, ոչ միայն անփորձ են, այլև՝ ամբարտավան, ցոփության ձգտող։
Դրա համար իմ հույսը մնում է Նիկոլ Փաշինյանը։ Իսկապես շատ մտահոգիչ բաներ կան։ Ասում են՝ գերակատարել են բյուջեն 89 միլիարդ դրամով, չի երևում, թե որտեղից է, ումից ինչքան են բերել։ Իսկ այդ անպատասխանատվությունը մտահոգիչ է, քանի որ նախկինում իշխանություններին սատարող որոշ ուժեր սկսել են երես թեքել»,- ասաց Պետրոս Մակեյանը։