Վրաստանի նախագահ Սալոմե Զուրաբիշվիլին Վրացական Առաջին ալիքի «Ազատ տեսլական» հաղորդմաշարին տված բացառիկ հարցազրույցում պատասխանել է Դավիթ-Գարեջի վանական համալիրի վերաբերյալ հարցին՝ հաղորդում է Georgia Online-ը:
Երկրի ղեկավարը հայտարարել է, որ Վրաստանը պետք է մինչև վերջ կայանա որպես պետություն և դրա համար նախ պետք է որոշի սահմանները հարևան Հայաստանի և Ադրբեջանի հետ:
«Անհասկանալի է, թե ինչու մենք չենք կարող ավարտել այդ գործընթացը բարեկամ երկրների հետ: Հենց այդպես էլ նշվել է երկու երկրների նախագահների հետ համաձայնագրերում, որ մեր հանձնաժողովները պետք է սկսեն աշխատել այդ ուղղությամբ, այն, ինչ հիմա փաստացի տեղի է ունենում: Սխալ կլինի ասել, որ սահմանը կանցնի այստեղով կամ այնտեղով, սակայն դա պարտադիր փուլ է մեր պետության և ապագայի համար, այլ կարծիք չի կարող լինել: Մենք պետք է մինչև վերջ կայանանք որպես պետություն, և դրա համար պետք է նախ հստակեցնել մեր սահմանները, ապա պաշտպանել դրանք: Հակառակը լինել չի կարող»,-նշել է Վրաստանի նախագահը:
