Երկրորդ նախագահ Ռոբերտ Քոչարյանի ազատության հանձնախմբի ֆեյսբուքյան էջում հրապարակվել է Քոչարյանի նամակը՝ արվեստի և մշակույթի այն գործիչներին, որոնք հանդես էին եկել հայտարարությամբ՝ իրեն կալանքից ազատ արձակելու պահանջով: «Գրում եմ ձեզ, որպեսզի հայտնեմ իմ անկեղծ երախտագիտությունը ձեր անունից հրապարակված հայտարարության համար, ուր կոչ էիք անում ազատել ինձ կալանքից։ Շնորհակալ եմ ձեզ ու զգացված եմ ձեր վերաբերմունքից: Տաղանդավոր, հայտնի և հեղինակավոր մարդկանց այսպիսի խմբի ուշադրությունը և հոգածությունը պատիվ կբերի ցանկացած քաղաքական և պետական գործչի»,- գրել է երկրորդ նախագահը։
Իհարկե, Քոչարյանն անտեսել է այն հանգամանքը, որ աղմկահարույց հայտարարության հեղինակներից շատերն անցած օրերին հայտարարել են, թե չեն ստորագրել որևէ փաստաթղթի տակ ու, մեղմ ասած, խիստ կասկածելի են այն հանգամանքները, որոնցում ծնվել է սկանդալային այս հայտարարությունը։
Սակայն հանրությանն ավելի շատ հետաքրքրում է Քոչարյանի արձագանքը մեկ այլ իրադարձության վերաբերյալ, որը հուշում է, թե երկրորդ նախագահի ռեպրեսիվ ձեռագիրն անփոփոխ է մնում՝ նույնիսկ այն պարագայում, երբ նա ազատազրկված է ու թվում էր՝ սահմանափակված է գործողությունների մեջ։
Ռոբերտ Քոչարյանի ենթադրյալ աջակից Վարուժան Մկրտչյանին այսօր մեղադրանք է առաջադրվել ՀՀ Քրեական օրենսգրքի 340-րդ հոդվածի 4-րդ մասի 1-ին կետով՝ սուտ ցուցմունք, կեղծ եզրակացություն տալու կամ սխալ թարգմանության համար կաշառելը կամ հարկադրելը՝ կազմակերպված խմբի կողմից: Վարուժան Մկրտչյանի նկատմամբ որպես խափանման միջոց է ընտրվել ստորագրությունը չհեռանալու մասին:
Նշված քրեական գործի շրջանակներում նույն հոդվածով նախատեսված հանցավոր արարք կատարելու կասկածանքով այսօր ձերբակալվել է «5-րդ ալիք»-ի սեփականատեր Արմեն Թավադյանը:
Վարուժան Մկրտչյանն «Ազատության» հետ զրույցում հաստատել էր, որ ոստիկանության հրապարակած տեսանյութում ինքն է զրուցում Մարտի 1-ի գործով տուժողի հետ:
Սկզբում Ռոբերտ Քոչարյանի հարազատներն ու թիմը հայտարարում էին, թե հայտնի տեսանյութը ոստիկանության կազմակերպած սադրանքն է, որի միջոցով իշխանություններն իբրև թե փորձում էին կանխորոշել Ռոբերտ Քոչարյանի խափանման միջոցի հարցով Վերաքննիչ դատարանի որոշումը։ Այս քարոզչական բլեֆը, սակայն, մեկ օրվա կյանք ունեցավ՝ մինչև Վարուժան Մկրտչյանը հրապարակավ հայտարարեց, թե ինքն է եղել Մարտի 1-ի գործով տուժողի հետ զրուցողը՝ հընթացս «հերոսացնելով» Ռոբերտ Քոչարյանին։
Ակնհայտ փաստերի ճնշման տակ երկրորդ նախագահի թիմը շրջանառու դարձրեց երկրորդ բլեֆը, ըստ որի՝ իրենց աջակիցը գործել է, այլ խոսքով՝ հանցագործություն է կատարել «ինքնաբուխ»։ Նախաքննությունն այսօր խորտակեց նաև այս մանիպուլյացիան, համենայնդեպս, Արմեն Թավադյանի ձերբակալությունը հնարավոր է դարձել կա՛մ մեղադրյալ Վարուժան Մկրտչյանի ցուցմունքի, կա՛մ էլ այլ բավարար հիմքերի առկայության պայմաններում։
«5-րդ ալիք» հեռուստաընկերությունը փաստացի պատկանում է Ռոբերտ Քոչարյանին, իսկ Արմեն Թավադյանը նրա մերձավորն է, ինչը ենթադրում է, որ Մարտի 1-ի տուժողին կաշառելու փորձը ուղղորդվել է հենց երկրորդ նախագահի կողմից։
Աղմկոտ տեսանյութի կծիկը քանդվեց․ հետքերը տանում են դեպի Քոչարյանը։
Ու պատկերացնել կարելի է, թե ինչերի է ընդունակ Քոչարյանը՝ ազատության պարագայում։
