Հոկտեմբերի 27-ի ահաբեկչության զոհերից Յուրի Բախշյանի այրին՝ Անահիտ Բախշյանն դիմել է Գլխավոր դատախազություն՝ պահանջով՝ վերացնել Հոկտեմբերի 27-ի գործից անջատված մասի կարճման որոշումն ու սկսել նոր քննություն։
Անահիտ Բախշյանը մեզ հետ զրույցում ասաց, որ սպասում է, թե ինչ են պատասխանելու, ըստ այդմ էլ՝ կորոշի հետագա անելիքները։
«Հոկտեմբերի վերջերին ես լսեցի, որ գլխավոր դատախազի խորհրդականը լրագրողների հարցին, թե տուժողի հարազատները չեն ստացել կարճման մասին որոշումը, պատասխանում է՝ թող դիմեին, ստանային։ Ես էլ այդ ամենը լսելուց հետո դիմեցի, ստացա։ Ես ունեմ բողոքարկելու իրավունք, ներկայացրել եմ, տեսնեմ՝ ինչ է լինելու»,- ասաց Անահիտ Բախշյանը։
Հոկտեմբերի 27-ին զոհված վարչապետ Վազգեն Սարգսյանի եղբայրը՝ Արամ Սարգսյանը, մեր հարցին, թե ինքն է՞լ է պատրաստվում դիմել գլխավոր դատախազություն՝ պահանջելու, որ վերացնեն Հոկտեմբերի 27-ի գործից անջատված մասի կարճման որոշումը և սկսեն նոր քննություն, արձագանքեց․ «Ես այդ հարցին բազմաթիվ անգամներ պատասխանել եմ։ Քանի դատական համակարգի բարեփոխումները չեն ավարտվել, և համակարգը չունի հանրային վստահություն, ես դեմ եմ գործի վերաբացմանը»։
Հոկտեմբերի 27-ին տուժած ԱԺ պատգամավոր Էմմա Խուդաբաշյանը մեզ հետ զրույցում նշեց, որ եթե կա Հոկտեմբերի 27-ը բացահայտելու խնդիր, բնականաբար, ինքը կանգնած է զոհվածների հարազատների կողքին։
«Ես համոզված եմ, որ նրանք խոհեմ մարդիկ են, կկայացնեն ճիշտ որոշում։ Ես կդիմեմ գլխավոր դատախազությանը, եթե իմանամ, որ դա կօգնի գործի բացահայտմանը»,- ասաց նա։
Հիշեցնենք, որ գործի այս մասը 2000 թվականին էր առանձնացվել, որպեսզի պարզվեր՝ արդյոք կայի՞ն հանցագործության այլ մասնակիցներ, դրդիչներ ու հնարավոր կազմակերպիչներ: Սակայն «Հոկտեմբերի 27»-ից առանձնացված այս գործը գլխավոր դատախազությունը կարճել էր 4 տարի անց՝ 2004 թվականին՝ հանցադեպի բացակայության պատճառաբանությամբ։
Այն ժամանակ գլխավոր դատախազի պաշտոնում Աղվան Հովսեփյանն էր։