Պաղեստինցիները պատրաստ են շարունակել Իսրայելի հետ ուղիղ խաղաղ բանակցությունները ապրիլի 29-ից հետո, երբ լրանա ԱՄՆ միջնորդությամբ սահմանված 9-ամսյա ժամկետը: Այս մասին հայտարարել է Պաղեստինի առաջնորդ Մահմուդ Աբասը Երուսաղեմում պաղեստինա-իսրայելական խորհրդակցությունների հերթական ռաունդի ավարտին, որը, ինչպես և նախորդները, շոշափելի արդյունքների չի հանգեցրել:
Ինչպես գրում է Jerusalem Post-ը, Աբասն ընդգծել է, որ պաղեստինյան կողմը չի հրաժարվում բանակցությունների ժամկետի երկարացումից, սակայն դրա համար Իսրայելից պահանջում է երեք պայմանների կատարում. արաբ բանտարկյալների 4-րդ խմբի ազատում, հրեական բնակավայրերում շինարարության սառեցում և վերսկսված բանակցությունների առաջին երեք ամիսների ընթացքում երկու պետությունների ապագա սահմանների մասին հարցի քննարկում:
Աբասն անդրադարձել է նաև կարգավորման որոշ սկզբունքային հարցերի:
Առաջինը՝ նա հերքել է Պաղեստինյան ազգային վարչակազմի ինքնալուծարման մասին հայտարարելու մտադրությունը: Նրա խոսքով՝ դրան կարող է հանգեցնել միայն բանակցային գործընթացի լիարժեք ձախողումը, և այդ դեպքում Իսրայելի վրա կընկնի պաղեստիցիների առօրյա կարիքների ապահովումը: Երկրորդ՝ պաղեստինցի առաջնորդը հաստատել է որպես հրեական պետություն Իսրայելի ճանաչելուց իր հրաժարվելը՝ ընդգծելով, որ այն պետք է լինի պետություն իր բոլոր քաղաքացիների համար, այլ ոչ թե միայն հրեաների:
Jerusalem Post-ը նշում է, որ Աբասի հարցազրույցից անմիջապես հետո Իսրայելի վարչապետ Բենյամին Նեթանյահուի գրասենյակի ներկայացուցիչը հայտարարել է, որ Իսրայելը մերժում է բանակցային գործընթացը շարունակելու ցանկացած նախապայման: «Պաղեստինցի առաջնորդի արտահայտությունները վկայում են, որ նա հետաքրքրված չէ խաղաղությամբ»,- ասել է Իսրայելի ներկայացուցիչը:
