Հայաստանի ՄՄ անդամակցությանը խոչընդոտում է Ադրբեջանը: Այս մասին այսօր «Առաջին լրատվական»-ի հետ զրույցում ասաց ՌԳԱ Արևելագիտության ինստիտուտի Կենտրոնական Ասիայի, Կովկասի և Ուրալ-Պովոլժիեի ուսումնասիրության կենտրոնի աշխատանքային խմբի համակարգող Ալեքսանդր Սկակովը՝ անդրադառնալով Մաքսային միությանը Հայաստանի միանալու վերաբերյալ հակադիր տեղեկություններին և պարզաբանելով հարցը, թե ինչ խնդիր կա Հայաստանի ՄՄ անդամակցության ճանապարհին, որ անդամակցության փաստաթուղթը նախատեսված ժամկետում չի ստորագրվելու: Նա նաև պարզաբանեց Վահրամ Ավանեսյանի միտքը, թե Հայաստանը միանգամից կանդամակցի Եվրասիական տնտեսական միությանը:
Նա նշեց, որ Մաքսային միությունն արդեն իրողություն է, և, առանց Մաքսային միությանն անդամակցության, Եվրասիական տնտեսական միություն գոյություն չունի, ուստի Եվրասիական տնտեսական տարածքին մաս կազմելու հայտարարությունն, առանց ՄՄ անդամակցության, միայն մտադրություն է և ոչ ավելին:
«Եթե Հայաստանը չի անդամակցում ՄՄ-ին՝ չի գնում ոչ մի տեղ, այսինքն՝ հայտնում է պատրաստակամություն մտնելու մի միություն, որը դեռ գոյություն չունի: Ուստի ես կարծում եմ, որ խնդիրը կապված է ռուսական քաղաքականության հետ, Ռուսաստան-Բելառուս-Ղազախստան հարաբերությունների հետ, Ադրբեջանի կողմից այդ հարաբերությունների վրա ազդեցության հետ»,- ասաց Սկակովը՝ հավելելով, որ Ադրբեջանը, հաշվի առնելով այն պայմանավորվածությունները, որոնք ձեռք են բերվել Պուտինի և Սարգսյանի միջև նախորդ տարի, անում է ամեն ինչ, որպեսզի Հայաստանը չդառնա ՄՄ անդամ, և որպեսզի ԼՂ-ն չունենա անվտանգության երաշխիքներ, որոնք Պուտինը տալիս է:
Ռուսաստանցի վերլուծաբանի համոզմամբ՝ ՄՄ-ից ՀՀ-ի հրաժարումը միայն Ադրբեջանի հետաքրքրությունների շրջանակում է, քանի որ այսօր Հայաստանի հնարավոր անդամակցությանը խոչընդոտելու նպատակով ընթանում են բանակցություններ Բելառուս-Ադրբեջան, Ղազախստան-Ադրբեջան ձևաչափով:
Հիշեցնենք, որ ՀՀ էկոնոմիկայի նախարարի պաշտոնակատար Վահրամ Ավանեսյանն ասել էր, թե հնարավոր է՝ Հայաստանը չստորագրի Մաքսային միությանն անդամակցելու փաստաթուղթը, այլ միանգամից ստորագրի Եվրասիական տնտեսական միությանը միանալու պայմանագիրը, ապա հստակեցրել էր, որ ապրիլի 29-ին չի նախատեսվում Մաքսային միությանը Հայաստանի անդամակցության փաստաթղթի ստորագրումը, և որ իր մեղքով է սխալ տեղեկություն տարածվել:
