«Լիդիան» ընկերությունը հայտարարություն է տարածել, որ իր գլխավոր պարտատերերի հետ ստորագրել է չորրորդ՝ հերթական հետաձգման համաձայնագիրը, համաձայն որի՝ պարտատերերը համաձայնել են հետաձգել «Լիդիանի» ֆինանսական պարտավորությունների գծով վճարումների իրենց պահանջները մինչև 2019 թվականի դեկտեմբերի 20-ը: «Ամուլսարի» թեմայի շուրջ զրուցելու համար «Առաջին լրատվական»-ը հյուրընկալել է «Քաղաքացու որոշում» կուսակցության գործադիր մարմնի անդամ Միքայել Նահապետյանին և բնապահպան Թեհմինե Ենոքյանին:
Անդրադառնալով ջերմուկցիների հետ բնապահպանների հավաքին՝ Միքայել Նահապետյանը նշեց, որ հավաքի մասնակիցները միաձայն որոշեցին թույլ չտալ «Լիդիան Արմենիա» ընկերությանը մուտք գործել ծրագրի տարածք. «Հիմա սպասենք տեսնենք, թե ինչպիսին կլինեն հետագա զարգացումները: Ես հույս ունեմ, որ չեն լինի այնպիսի զարգացումներ, որոնք կանցնեն հետդարձի կետը, այսինքն՝ հնարավորություն չի լինի հարցերը լուծել խոսելու, քննարկելու, եզրեր գտնելու ճանապարհով»:
Մեր զրուցակցի կարծիքով՝ ջերմուկցիներն իրավունք ունեին «Լիդիան»-ին թույլ չտալու ձմեռացման աշխատանքներ կատարել. «Որովհետև սա ըստ էության կոնֆլիկտ է, որտեղ կան կողմեր, և ընթանում է բանակցություն, որը պետք է անցկացվի վստահության միջավայրում, իսկ դա այս դեպքում խաթարվել է երկու այլ գործընկերների՝ «Լիդիան»-ի և ՀՀ կառավարության՝ իրենց ստանձնած պարտավորություններին չհետևելու հետևանքով»:
Միքայել Նահապետյանի խոսքով՝ առ այսօր կառավարությունը փորձում է մանևրել և չկայացնել այն որոշումը, որ պետք է կայացներ իր իսկ առաջադրած պայմանով. «Կառավարությունը իրավիճակը թողել է ինքնահոսի՝ կա՛մ այս կողմը կհանձնվի, կա՛մ այն կողմը, և ժամանակ են ձգում»:
Հարցազրույցն ամբողջությամբ՝ տեսանյութում:
