Հանրապետական կուսակցության փոխնախագահ Արմեն Աշոտյանը օրերս հայտարարել է, որ խորհրդարանի արտահերթ ընտրությունը բխում է վարչապետ Նիկոլ Փաշինյանի շահից, քանի որ կօգնի նրան դիմագրավել Արցախյան հարցում բարդ բանակցություններին:
Արցախի հարցում Նիկոլ Փաշինյանին օժանդակություն ՀՀԿ-ն թերևս ցույց է տվել խորհրդարանի նախորդ արտահերթ ընտրությանը ու նաև հետագա ամիսներին՝ պարբերաբար քննադատելով նրան, այսպես ասած, վատ քաղաքականության, վտանգներ հարուցելու, բանակցային գործընթացը բացասական դաշտ տեղափոխելու կամ այլ կերպ ասած՝ «հող հանձնելու» համար:
Կազանյան ամոթալի պլանի շուրջ բանակցած քաղաքական ուժի այդ քննադատությունները Նիկոլ Փաշինյանին կամա թե ակամա աջակցել են նրանով, որ չփաստարկված, չհիմնավորված ընդդիմախոսությամբ ՀՀԿ-ն Արցախյան հարցում հանրությանն էլ ավելի է կոնսոլիդացրել վարչապետ Փաշինյանի շուրջը՝ տալով նրան, այսպես ասած, կոշտ քաղաքականության ակամա մանդատ՝ ի հեճուկս «հանձնելու» վերաբերյալ քննադատության:
Դատելով մի շարք արտաքին միջավայրային փոփոխություններից և իրողություններից՝ Փաշինյանին հաջողվել է կապիտալիզացնել այդ մանդատը: Այդ՝ արցախյան հարցի գործընթացի իմաստով խորհրդարանի արտահերթ ընտրություն Փաշինյանին պետք չէ: Պե՞տք է արդյոք այլ իմաստով՝ դա էլ արդեն այլ հարց է, որին արժե անդրադառնալ այլ առիթով:
Խորհրդարանի արտահերթ ընտրություն պետք է ՀՀԿ-ին, և Արմեն Աշոտյանի խոսքում այդ իմաստով առաջարկ է Նիկոլ Փաշինյանին: ՀՀԿ-ն արտահերթ ընտրությամբ ակնկալում է հայտնվել խորհրդարանում: Ու թեև դրա դիմաց ակնարկվում է Արցախյան հարցում Փաշինյանին որևէ կերպ աջակցելու մասին, տողատակում թերևս Հանրապետականը ունի այլ առաջարկ, որն առնչվում է ներքին կյանքին: Թե ինչքանով կարող է ՀՀԿ որևէ առաջարկ վստահելի լինել Նիկոլ Փաշինյանի համար՝ դա էլ այլ հարց է: Մի բան է թերևս հստակ, որ ՀՀԿ-ն լավ է պատկերացնում ներկայիս միջավայրում իր առավելությունը բոլոր այն ուժերի նկատմամբ, որոնք հավակնում են զբաղեցնել ընդդիմության առաջատարի դիրք՝ հատկապես աշխատելով նախկին իշխող համակարգի պոտենցիալ ընտրազանգվածի շրջանում:
Բանն այն է, որ տեսականում մոտ ապագայում արտահերթ ընտրության պարագայում ՀՀԿ-ն ունի ընդդիմադիր, դժգոհ ընտրազանգվածը մոբիլիզացնելու առավել մեծ ներուժ՝ մի շարք պատճառներով: Ընտրազանգվածը խոշոր հաշվով լինելու է բևեռացված վարչապետի աջակցության (գերակշռող մասը) և ծայրահեղ դժգոհության միջև: Ահա այդ երկրորդ բևեռի հարցում հավակնորդ ուժերի շարքում ներկայումս առավելություն ունի ՀՀԿ-ն, և արտահերթ ընտրությունը թույլ կտա Հանրապետականին իրացնելու այդ առավելությունը: Չի բացառվում, որ կա ակնարկ Նիկոլ Փաշինյանին, որ արժե դիտարկել այդ տարբերակը, քանի դեռ որևէ քաղաքական միավոր իր շուրջը չի կապիտալիզացրել Ռոբերտ Քոչարյանը և խլել առավելությունը ՀՀԿ-ից:
Լուսանկարը՝ Armeniasputnik-ի