Մոսկվայի քաղաքային դատարանը 23 տարվա ազատազրկման է դատապարտել «մոգ» Գեորգի Մարտիրոսյանին իր 3 կին հաճախորդներին թալանելու ու սպանելու համար, հայտնում է ITAR-TASS-ը:
Դատարանը պարտադրել է Մարտիրոսյանից հօգուտ սպանվածների ազգականների, որպես նյութական փոխհատուցում, բռնագանձել 8 մլն ռուբլի, ևս 15 մլն ռուբլի բռնագանձել որպես բարոյական վնասի փոխհատուցում:
Ազատ արձակվելուց հետո նա 2 տարով ազատ տեղաշարժվելու իրավունք չի ունենալու և պետք է հաշվառվի իրավապահ մարմիններում:
Մարտիրոսյանի փաստաբան Սերգեյ Սուխանովը հայտարարել է դատարանի վճիռը բողոքարկելու մտադրության մասին:
Երդվյալ ատենակալները ավելի վաղ Մարտիրոսյանին մեղավոր էին ճանաչել մեղադրանքի բոլոր կետերով:
Պետական մեղադրողը պահանջում էր 25 տարվա ազատազրկում, տուժածները պնդում էին ամբաստանյալին ցմահ բանտարկության դատապարտել:
Գործի նյութերով` Մարտիրոսյանը տեղեկություն է ստացել տուժածների մոտ խոշոր գումարների առկայության մասին, նրանց տուն գնացել իբր թե մոգության ծես անցկացնելու համար, կանանց ըմպելիքների մեջ հերոին լցրել, որից հետո նրանց թմրանյութի մահացու չափաբաժին է ներարկել:
