Հուլիսի 13-ին Մումբայի (Հնդկաստան) ոսկերչական շուկայում տեղի ունեցած պայթյունը մեծ վնասներ է հասցրել տեղի գործարարներին: Այս մասին գրում է The Times of India-ն: Նրա տեղեկություններով՝ պայթյունի հետևանքով փողոց են թափվել մոտ 5.6 մլն դոլարի ադամանդներ:
Թերթը գրում է, որ «դժվար է հավատալ, սակայն վաճառողներից շատերն ադամանդները կրում են իրենց գրպաններում կամ քայլում ձեռքներում պահած»: Այդ պատճառով պայթյունի ժամանակ ադամանդները ցրվել են փողոցով մեկ: «Այո, սա այն է, ինչ մենք սովոր ենք անել: Մեզանից շատերն առևտուր են անում թզենու տակ նստած կամ սեղանի շուրջ: Կարծում եմ, որ շատերը կորցրել են իրենց ադամանդները»,- ասել է Ադամանդ վաճառողների ընկերակցության քարտուղար Բհարաթ Սահը:
Մեկ այլ գործարար ասել է, որ հնարավոր է՝ վնասների գումարներն աճեն, քանի որ ոստիկանությունը դեռ չի թույլատրում գործարարներին մոտենալ իրենց աշխատատեղերին:
