Անցած տարի հունվարին ՀԱՊԿ քարտուղարության և Հայաստանի ազգային անվտանգության խորհրդի աշխատակազմի միջև ՀԱՊԿ ակադեմիայի ֆոնդ ստեղծելու վերաբերյալ հուշագիր կնքվեց: Փաստաթուղթը կնքեցին Անվտանգության խորհրդի քարտուղար Արթուր Բաղդասարյանն ու ՀԱՊԿ գլխավոր քարտուղար Նիկոլայ Բորդյուժան: Արթուր Բաղդասարյանն այն ժամանակ հայտարարեց, որ ակադեմիան կլինի «լուրջ վերլուծական կենտրոն», իսկ Նիկոլայ Բորդյուժան հավելեց, որ Ակադեմիան նախատեսված է ՀԱՊԿ և դրանից դուրս երկրներում մասնագետներ պատրաստելու համար: Դա կլինի կենտրոն, որտեղ կկրթվեն ապագա քաղաքագետներ, կմշակվեն անվտանգության ոլորտի հարցերի լուծումների վերաբերյալ առաջարկներ և կքարոզվեն ՀԱՊԿ նպատակներն ու խնդիրները:
Ակադեմիան հիմնելու համար ավելի ուշ կառավարության որոշմամբ Երևանի Հրաչյա Աճառյանի անվան թիվ 72 հիմնական դպրոցի, որի գործունեությունն աշակերտների թվաքանակի նվազման պատճառով դադարեցվել էր, շենքն անհատույց օգտագործման իրավունքով տրամադրվեց «Հավաքական անվտանգության պայմանագրի կազմակերպության ակադեմիա» հիմնադրամին: Հերացի փողոցի վրա գտնվող դպրոցի տեղում, սակայն, ակադեմիա, գոյություն չունի՝ դիմացի պատից այն կողմ ոչ մի բան չկար:
Մեր նկարահանման պահին շինհրապարակում առանձնապես աշխատանքներ չէին կատարվում, որևէ շինտեխնիկա չկար: Տարածքում մի քանի բանվորներ էին, ովքեր հրաժարվեցին խոսել, ասացին, որ ոչնչից տեղյակ չեն, իրենց ասել են քանդել՝ իրենք էլ քանդում են:
«Բայց թե սրա ճակատագիրը ինչ կլինի՝ դեռ հայտնի չէ»,- ասաց բանվորներից մեկը՝ ակնարկելով Արթուր Բաղդասարյանի հրաժարականը Անվտանգության խորհրդի քարտուղարի պաշտոնից:
Բանվորները նաև չկարողացան ասել, թե մոտավորապես երբ է նախատեսված ավարտել շինարարությունը:
Նշենք, սակայն, որ այս տարվա փետրվարի 5-ին Երևանում Արթուր Բաղդասարյանի և ՀԱՊԿ գլխավոր քարտուղար Նիկոլայ Բորդյուժայի հանդիպման ժամանակ Բաղդասարյանը հայտարարել էր, որ Հայաստանում ՀԱՊԿ ակադեմիան կգործի այս տարվա սեպտեմբերից:
Ի դեպ, չնայած ՀԱՊԿ ակադեմիայից դեռևս դիմացի պատն է միայն կանգուն, արդեն լրատվամիջոցներում տեղեկություն է շրջանառվում, որ օրերս կոալիցիայից դուս եկած և իրեն ընդդիմություն հռչակած ՕԵԿ ղեկավար, ԱԱԽ քարտուղար Արթուր Բաղդասարյանն է դառնալու Ակադեմիայի ռեկտորը:
Հիշեցնենք, որ ավելի վաղ վայր դնելով մանդատը՝ ՀԱՊԿ ակադեմիայի ռեկտոր էր նշանակվել ՕԵԿ-ական պատգամավոր Խաչիկ Հարությունյանը, ով, սակայն, կարճ ժամանակ անց հրաժարվեց նաև այդ պաշտոնից՝ թերևս այն պատճառով, որ «ավերակների վրա թագավորել» հնարավոր չէր: Բայց ինչպես երևում է, հաջորդիվ Արթուր Բաղդասարյանն է դառնալու «ավերակի ռեկտորը»:
Մենք փորձեցինք ՕԵԿ խոսնակ Արթուր Միսակյանից պարզել, թե նախ՝ որքանո՞վ են իրականությանը համապատասխանում Բաղդասարյանի՝ ՀԱՊԿ ակադեմիայի ռեկտոր նշանակվելու լուրերը, ինչպես նաև՝ ի՞նչ կամ ո՞ւմ միջոցներով է ակադեմիայի շինարարությունը ավարտին հասցվելու, սակայն խոսնակն այդպես էլ չպատասխանեց մեր զանգերին: