Սյունիքի նախկին մարզպետ, Հատուկ քննչական ծառայությունում քննվող քրեական գործով որպես մեղադրյալ ներգրավված Սուրիկ Խաչատրյանի մոտ ախտորոշված հիվանդությունները խոչընդոտ չեն հանդիսանում նրա՝ տարածության մեջ ինքնուրույն տեղաշարժման, տրանսպորտային միջոցներով որեւէ այլ երկիր, այդ թվում՝ Հայաստանի Հանրապետություն տեղափոխման համար: Այս մասին Armtimes.com-ին հայտնել են ՀՀ հատուկ քննչական ծառայությունից:
«Փաստաբանի կողմից ուղարկված փաստաթղթերի հիման վրա նշանակվել է դատաբժշկական փորձաքննություն, որի եզրակացության համաձայն՝ ըստ ներկայացված փաստաթղթերի՝ Սուրիկ Խաչտրյանն իր բուժումը կարող է շարունակել ստանալ նաեւ ՀՀ-ում»,- ասել են ՀՔԾ-ից:
Նոյեմբերի 20-ին ՀՔԾ-ն հայտարարեց Սուրիկ Խաչատրյանին որպես մեղադրյալ ներգրավելու, խափանման միջոց կալանավորումն ընտրելու և հետախուզում հայտարարելու մասին: Ավելի ուշ պարզ դարձավ, որ Խաչատրյանն իր փաստաբանի միջոցով բժշկական փաստաթղթեր է տրամադրել վարույթն իրականացնող մարմնին՝ նշելով, որ արտերկրում բուժում է ստանում, և Հայաստան կվերադառնա այն ավարտելուց հետո:
