Քրեական աշխարհում հայտնի Թևոսիկի եղբոր՝ Արթուր Սաֆարյանի սպանության գործը ոստիկանությունից տեղափոխվել է Ազգային անվտանգության ծառայություն: Այս մասին «Առաջին լրատվական»-ի հետ զրույցում ասաց ոստիկանության լրատվության եւ հասարակայության հետ կապերի ծառայության աշխատակից Արմեն Մալխասյանը:
ԱԱԾ մամուլի խոսնակ Արծվի Բաղրամյանը մեզ հետ զրույցում նույնպես հաստատեց, որ գործը տեղափոխվել է իրենց վարույթ, սակայն պատճառների մասին ԱԱԾ խոսնակը չնշեց՝ ավելացնելով միայն, որ գործը ԱԱԾ է տեղափոխվել դատախազության հրահանգով:
Դատախազությունից գործի տեղափոխման պատճառների մասին նույնպես չհայտնեցին: «Գործը մեկ նախաքննական մարմնից մյուսը տեղափոխելը դատախազության լիազորությունն է: Ավել բան չկա»,- ի պատասխան մեր հարցի՝ ասացին դատախազության լրատվական ծառայությունից:
Հիշեցնենք, որ Արթուր Սաֆարյանը սպանվեց հունվարի 27-ին Երևանի կենտրոնում՝ Արամի նրբանցքի 5/ա շենքի բակում: Դեպքի առթիվ հարուցվել էր քրեական գործ ՀՀ քրեական օրենսգրքի 104-րդ հոդվածի 1-ին մասի (սպանություն) և 235-րդ հոդվածի 1-ին մասի (ապօրինի զենք-զինամթերք կրելը, պահելը, օգտագործելը) հատկանիշներով: Գործով որպես մեղադրյալ անցնում են Իսրայել Սարգսյանը՝ Իսոն, և Տիգրան Ասատրյանը: Նրանցից և ոչ մեկը, սակայն, չի ընդունում իր մեղքը:
