Ամերիկացի միլիարդատեր և Նյու Յորքի նախկին քաղաքապետ Մայքլ Բլումբերգը հայտարարել է նախագահական ընտրություններին իր մասնակցության մասին՝ ԱՄՆ ներկայիս նախագահ Դոնալդ Թրամփին պարտության մատնելու և «Ամերիկան վերականգնելու» համար:
Այս մասին գործարարը գրել է Twitter-ի իր էջում: Գործում է նաև նրա նախընտրական կայքը:
«Մենք չենք կարող մեզ թույլ տալ նախագահ Թրամփի անխոհեմ և ոչ բարոյական գործողությունների ևս չորս տարի»,- գրել է նա:
Բլումբերգի նախագահական նկրտումների մասին հայտնի է դարձել նոյեմբերի սկզբին: Այդ ժամանակ հայտարարվել էր, որ 77-ամյա քաղաքական գործիչը դեմոկրատների շրջանում չի տեսնում ուժեղ թեկնածուներ, ուստի որոշել է մասնակցել նախագահական ընտրություններին, քանի որ նա Թրամփին համարում է «աննախադեպ սպառնալիք» ամերիկյան ազգի համար:
Բլումբերգը Bloomberg տեղեկատվական-վերլուծական գործակալության հիմնադիրն ու սեփականատերն է և աշխարհի ամենահարուստ մարդկանցից մեկը. նրա կարողությունը գնահատվում է ավելի քան 50 միլիարդ դոլար:
