Հարավարևելյան Ուկրաինա և Մերձդնեստր մուտքը Ռուսաստանի համար աղետով է ավարտվելու: Այս մասին այսօր «Առաջին լրատվական»-ի հետ զրույցում ասաց Միջազգային հարաբերությունների լեհական ինստիտուտի (Վարշավա) քաղաքական փորձագետ Կոնրադ Զաշտովտը՝ խոսելով Հարավարևելյան Ուկրաինայում և Մերձդնեստրում ստեղծված իրավիճակի շուրջ:
Նա նշեց, որ անկախ Մոսկվայի որոշումներից, Տիրասպոլի որոշումներից՝ Մոլդովան կստորագրի ԵՄ-ի հետ Ասոցացման համաձայնագիրը, քանի որ դա մի տարածք է, որն արդեն 1990-ական թթ. չի ղեկավարվում և վերահսկվում Մոլդովայի կողմից, այնպես որ համեմատել Ղրիմի հետ, չարժե: Զաշտովտի խոսքով՝ Ղրիմը լիովին ենթակա էր Կիևյան կենտրոնական իշխանություններին, և ղրիմյան հակամարտությունը Կրեմլի կողմից արհեստականորեն հրահրված էր՝ հանրաքվեն և այն, ինչ տեղի ունեցավ հետո, այսինքն՝ առանց Կրեմլի օժանդակության, իրավիճակի արհեստական տաքացման Ղրիմում ոչինչ տեղի չէր ունենա, իսկ Մերձդնեստրն այլ է:
«Այդ տարածքը բավականին վտանգավոր ռեգիոն է: Նկատի ունեմ այն, որ այնտեղ զենքի առևտուր է գնում, որը ոչ միայն Մոլդովայի, այլև տարածաշրջանի, ԵՄ-ի համար վտանգավոր գոտի է: Այնպես որ՝ այն, ինչ տեղի է ունենում վերջին օրերին Մոլդովայի շուրջ, ոչ միայն Մերձդնեստրով է պայմանավորված, բայց անջատողական հայտարարություններ են հնչում ակտիվիստների կողմից Մոլդովայում և Մոլդովայի այլ հատվածներում, ինչպես Գագաուզիան, այլ շրջաններ, բայց դրանք բոլորը արհեստականորեն են հրահրվում, որպեսզի վախեցնեն Մոլդովային և վախեցնեն մոլդովական քաղաքական գործիչներին, որպեսզի նրանք չստորագրեն ԵՄ-ի հետ ԱՀ/ԽՀԱԱԳ-ն: Ուկրաինայում իրավիճակը չափազանց լարված է, և մենք պատերազմի շեմին ենք: Եթե նույնիսկ հունիսի սկզբին այդ համաձայնագիրը ստորագրվի, դժվար է ասել, թե այս ընթացքում ինչ տեղի կունենա, ինչ տեղի կունենա Հարավարևելյան Ուկրաինայում, ինչպես կզարգանա հակամարտությունը: Եթե ՌԴ-ն վճռի մտնել Հարավարևելյան Ուկրաինա, եթե այնտեղ պատերազմ սկսվի, կփոխվի ամբողջ իրավիճակը, հիմա դժվար է ասել, թե իրադարձություններն ինչպես կզարգանան»,- ասաց լեհ փորձագետը՝ շարունակելով, որ իրավիճակը կախված է Կրեմլից, թե ինչպես Կրեմլը կաջակցի անջատողականներին Արևելյան Ուկրաինայում, ՌԴ-ն կորոշի ուղարկել իր զորքերն Ուկրաինա, թե ոչ:
Դիտարկմանը, թե ԵՄ-ն այսօր հետևողի՞ դերում է, թե կան գործողություններ խնդրահարույց շրջանների անվտանգության ապահովման ուղղությամբ, արձագանքեց, ասելով, որ ԵՄ-ում չկա կոնսենսուս: «Պորտուգալիայի համար այս տարածաշրջանը հեռավոր մի բան է, իսկ Լեհաստանի համար դա մեծ խնդիր է և իր ազդեցությունն է ունենում մեր երկրի անվտանգության վրա, մենք անհանգստացած ենք և փորձում ենք ազդել մեր գործընկերների կարծիքի վրա, որպեսզի ՌԴ-ի դեմ կտրուկ միջոցներ լինեն: Պատժամիջոցներն ավելի ու կտրուկ են լինելու և դա ազդելու է ՌԴ-ի վիճակի վրա: Հարավարևելյան Ուկրաինայում ստեղծված իրավիճակը տարածաշրջանի համար աղետ է, բայց աղետ է նաև Ռուսաստանի համար, խնդիր՝ ԵՄ-ի համար»,- նշեց նա՝ ակնարկելով, որ ՌԴ-ն չի կարողանա այս քաղաքականությամբ առաջ շարժվել դեպի այլ ռեգիոններ:
