«Ո՛չ նկատողություն եմ ստացել, ո՛չ խիստ նկատողություն, բայց հեռացվել եմ աշխատանքից»,- «Առաջին լրատվական»-ի հետ զրույցում ասաց Շահեն Հարությունյանը, ով երեկ ֆեյսբուքյան իր էջում գրառում է կատարել՝ տեղեկացնելով, որ նոյեմբերի 1-ից այլևս չի աշխատում ԱԺ-ում, հեռացվել է աշխատանքից։
«Հարգելի հայրենակիցներ,
տեղեկացնում եմ, որ նոյեմբերի 1-ից այլևս չեմ աշխատում ՀՀ Ազգային ժողովում։ Շուրջ 10 ամիս աշխատելով ԱԺ-ում՝ ձեռք եմ բերել պետական ոլորտում աշխատանքային որոշակի փորձ։ Կարծում եմ՝ աշխատանքային այս փորձը, հնարավորության դեպքում, կօգնի ինձ ավելի դյուրին ինտեգրվել պետական աշխատանքային գործընթացներին։
Հ.Գ. ԱԺ-ից հեռանում եմ ոչ սեփական դիմումի համաձայն, այլ՝ հեռացումով, քանի որ աշխատանքից հեռանալու նպատակով ինձ բերված փաստարկները համոզիչ չէին, գոնե ինձ համար։ Հույս ունեմ, որ այս գրառումը շահարկումների առարկա չի դառնա»,- գրել է Հարությունյանը։
Մեզ հետ զրույցում ևս Շահեն Հարությունյանը չցանկացավ խոսել հեռացման պատճառների մասին։ «Ինձ առաջարկվել է դիմում գրել, բայց չեմ գրել ազատվելու դիմում, քանի որ ինձ համար պատճառաբանությունները համոզիչ չեն եղել։ Իսկ ես տեսակով այնպիսի մարդ եմ, որ չեմ նախաձեռնի մի բան, որի հետ համաձայն չեմ։ Պատգամավորը իր հարցազրույցներից մեկում նշել է, որ ունի նոր մասնագետի կարիք։ Նման թեթև խոսակցություն եղել է, բայց հեռացումը լրիվ ուրիշ բանի հետ է կապված, որոշումը ուրիշ պատճառով է կայացվել»,- ասաց նա։
Հիշեցնենք, որ Շահեն Հարությունյանը Ազգային ժողովում աշխատում էր որպես ԱԺ «Իմ քայլը» խմբակցության պատգամավոր Երջանիկ Հակոբյանի օգնական։
Աշխատանքից հեռացվելուց հետո, սակայն, Հարությունյանը չի բողոքարկելու, չի վիճարկելու իր հեռացման հրամանը։
Շահեն Հարությունյանն ասաց, որ ինքը դեռ ուսանող է, պատրաստվում է ավարտել ուսումը, կենտրոնանալ իր ստեղծած կազմակերպության վրա, հետո նոր մտածել նոր աշխատանքի մասին: «Ամեն դեպքում պառլամենտում 10 ամիս աշխատանքը ինձ որոշակի հմտություններ տվել է, և կարծում եմ՝ առաջիկայում խնդիրներ չեն լինի»,- եզրափակեց Շահեն Հարությունյանը։