Ուկրաինական ճգնաժամի կարգավորման հարցով Ժնևում տեղի ունենալիք բանակցությունների անհաջող ելքի դեպքում Փարիզը չի բացառում Ռուսաստանի նկատմամբ պատժամիջոցների մակարդակի բարձրացման հնարավորությունը: Այսպիսի հայտարարություն է արել Ֆրանսիայի նախագահ Ֆրանսուա Օլանդը՝ Ելիսեյան պալատում Չեխիայի վարչապետ Բոգուսլավ Սոբոտկայի հետ բանակցություններից հետո՝ հայտնում է ITAR-TASS-ը: Նա նշել է, որ այսպիսի որոշում կարող է ընդունվել Բրյուսելում ԵՄ արտահերթ գագաթնաժողովի ժամանակ:
Միաժամանակ, նա նշել է, որ իրադարձությունների այդպիսի զարգացումը Ֆրանսիայի համար առավել ցանկալի չի լինի. «Դա, սակայն, մեր ձգտումը չէ,- ավելացրել է նախագահը:- Մեր ձգտումը սրությունը մեղմելու համար ամեն հնարավոր բան անելն է»:
Միևնույն ժամանակ, Օլանդի խոսքով, Ուկրաինայում ճգնաժամի կարգավորումը պետք է հետևի «քաղաքական օրակարգին», ինչը ենթադրում է մայիսի 25-ին նախագահական ընտրությունների անցկացումը, որոնք կոչված են ապահովելու «ճգնաժամից ելքը»:
Ժնևում ԱԳՆ ղեկավարների մակարդակով քառակողմ խորհրդակցությունների վերաբերյալ Օլանդն ասել է, որ այդ բանակցությունները «երկխոսության, այնուհետ ճգնաժամից դուրս գալու լուծման հնարավորություն են ընձեռում»:
«Սակայն այժմ այնպիսի գործողություններ են իրականացվում, որոնք կարող են հանգեցնել ուժի կրառման: Այդպիսով, մենք պետք է կոշտություն ցուցաբերենք այն ամենում, ինչը վերաբերում է փուլային պատժամիջոցներ սահմանելուն և միաժամանակ անենք ամեն ինչ, որպեսզի հնարավոր լինի վերադառնալ ողջախոհությանը և հնարավոր լուծում գտնել Ուկրաինայի համար»,- նշել է Օլանդը:
