«Եվրոպական ինտեգրացիա» հասարակական կազմակերպության վարչության անդամ Մանվել Ղումաշյանն այսօր «Դե ֆակտո» ակումբում անդրադառնալով ղարաբաղյան կարգավորման գործընթացին՝ նախ նշեց, որ Կազանյան հանդիպումից միջնորդները սպասում էին բեկումնային լուծումներ, իսկ երկրորդը, ինչը ցույց տվեց Կազանյան հանդիպումը այն էր, որ Ադրբեջանը փաստորեն բաց տեքստով ասաց, որ չի ցանկանում որևէ փոփոխություն, չի ցանականում փոխել ստատուս-քվոն. «Ադրբեջանը հասկանում է, որ ստատուս-քվոյի ցանկացած փոփոխություն, նույնիսկ դրական լուծումը մեծ խնդիրներ է առաջացնելու ալիևների կլանի համար: Ալիևյան կլանը բնական է, որ խուսափում է իրավիճակի փոփոխություններից», – նշեց քաղաքագետը՝ մատնանշելով Կազանում Ադրբեջանի կողմից տասը առաջարկությունների ներկայացումը:
«Ես չէի ասի, թե միջնորդները ցանկանում են անպայման սկզբունքային հարցերում լուծումներ գտնել, պարզապես նրանք ցանկանում են, որ ԼՂ հարցում այնպիսի մի բեկումնային լուծման հանգեն, որը, չլինելով վերջնական, առաջին հերթին վերացնի պատերազմական գործողությունների վերսկսման հնարավորությունը և երկրորդը՝ հնարավորություն տա արդեն վերջնական լուծման փնտրտուքների հետ զուգահեռ նաև տնտեսական ծրագրեր իրականացնել տարածաշրջանում, ինչպիսին էր օրինակ ժամանակին Traseca-ն ու Inogate-ը:»:
Ինչ վերաբերում է օրերս Նախարարների կաբինետի նստաշրջանում Ադրբեջանի նախագահ Իլհամ Ալիևի ելույթին, ապա ըստ Մանվել Ղումաշյանի՝ այն դարձյալ ցույց տվեց ԼՂ-ի իրավաբանորեն պարտադիր կամարտահայտության սկզբունքին նա դեմ է: Իսկ Ադրբեջանի ԱԳ նախարար Էլմար Մամեդյարովի այն հայտարարություններին, թե «եկեք աշխատենք խաղաղության մեծ համաձայանգրի վրա, ըստ փորձագետի՝ դա խորամանկություն է. «Սա նշանակում է՝ եկեք խուսափենք հիմնարար սկզբունքների ստորագրումից և անցնենք մեկ այլ փաստաթղթի մշակման, որը կարող է տևել տարիներ, ինչպես գործող բանակցությունները տևեցին արդեն 17 տարի… Ադրբեջանին ձեռնտու է խուսափել Մադրիդյան սկզբունքների ստորագրումից»:
Հարցին, թե որքանո՞վ են ձեռնտու Մադրիդյան սկզբունքները հայկական կողմի համար, Մ. Ղումաշյանը նկատեց. «Ես կհիշեցնեի նախագահ Սերժ Սարգսյանի ելույթը Ստրասբուրգում, երբ նա ասաց, որ դա մեր երազած փաստաթուղթը չէ: Բնականաբար, դա այն լավագույն տարբերակը չէր, որ մենք կարող էինք ունենալ, բայց լինում են դեպքեր, երբ ընտրությունը կատարվում է ոչ թե լավի և վատի միջև, այլև՝ վատի և վատագույնի միջև: Սա է իրականությունը»,- նշեց նա՝ հիշեցնելով ԵԱՀԿ ՄԽ-ում ֆրանսիացի համանախագահի ելույթը Եվրոխորհրդարանում, երբ նա նշեց, որ եթե կողմերը համաձայնության չգան հիմնարար սկզբունքների շուրջ, ապա պետք է մշակել նոր կոնցեպտ. «Նոր ձևաչափը ավելի՞ լավը կլինի, թե՞ ավելի վատը… Կարող է ավելի լավը լինել, բայց կարող է ավելի վատը լինել»,- հայտարարեց նա:
