Լրագրողների հետ հանդիպմանը «Ինֆորմացիայի ազատության կենտրոն» ՀԿ-ի նախագահ Շուշան Դոյդոյանը ներկայացրեց այս «տարվա սև ցուցակը», որտեղ տեղ են գտել այն պաշտոնյաների անուններն ու պետական մարմինների անվանումները, որոնք խախտել ու խոչընդոտել են անձանց տեղեկատվություն ստանալու իրավունքը։
Վերջինս տեղեկացրեց, որ հուլիսի 1-ին «Ինֆորմացիայի ազատության կենտրոնի»10-ամյակի լրանալու կապակցությամբ ամփոփվել են 2003-2011 թթ. բոլոր «սև ցուցակները»։
Եվ այսպես, 10 տարում «սև ցուցակում» հայտնվել են նախարարներ՝ 39 անգամ։ Առողջապահության նախարարությունը՝ հայտնվել է 8 անգամ, տրանսպորտի և կապի նախարարությունը՝՝ 6 անգամ։ «Ընդ որում՝ Անդրանիկ Մանուկյանի օրօք նախարարությունը հայտնվել է 4 անգամ։ Սա երևի այն բացառիկ դեպքերից է, որ նույն անձը հայտնվում է 4 անգամ»,- նշեց Շ. Դոյդոյանը։ Բնապահպանության նախարարությունը «սև ցուցակում» հայտնվել է5 անգամ, ընդ որում, Վարդան Այվազյանի օրոք՝ 3 անգամ։ Էներգետիկայի ու բնական պաշարների նախարարությունը հայտնվել է 4 անգամ, արտակարգ իրավիճակների նախարարությունը՝ 3 անգամ, պաշտպանության նախարարությունը՝ 2 անգամ։ «Ցավով պիտի նշեմ, որ պաշտպանության նախարարությունը 7 տարվա ընդմիջումից հետո կրկին «սև ցուցակում» է», – հավելեց բանախոսը։
Կրթության ու գիտության նախարարությունը «սև ցուցակում» հայտնվել է 2, մյուս նախարարությունները՝ մեկական անգամ։
Բացի նախարարություններից՝ «սև ցուցակում» իրենց պատվավոր տեղն են զբաղեցրել մարզպետները։ Նրանք «սև ցուցակում» հայտնվել են 21 անգամ։ Առաջին հորիզոնականում են գտնվում Արարատի, Շիրակի ու Գեղարքունիքի մարզպետարանները՝ 4-ական անգամ, Լոռու մարզպետարանը՝ 3 անգամ։ Նշենք, որ միայն Կոտայքի մարզպետը չի հայտնվել «սև ցուցակում»։
Քաղաքապետարանները «սև ցուցակում» հայտնվել են 41 անգամ։ Երևանի քաղաքապետարանը հայտնվել է 7 անգամ։ Վերջին անգամ 2009թ. «սև ցուցակում» հայտնվել է Գագիկ Բեգլարյանը։ Երկրորդը Արմավիրի քաղաքապետարանն է՝ դարձյալ 7 անգամ։
Այս եռամսյակի «սև ցուցակում» տեղ է գտել 6 անձ։ Ցուցակը գլխավորում է տրանսպորտի և կապի նախարար Մանուկ Վարդանյանը, ՊՆ նախարար Սեյրան Օհանյանը, արտակարգ իրավիճակների նախարարը, «Համալսարանականներ» համատիրության նախագահ Արմեն Թադևոսյանը, Երևանի քաղաքապետարանի տեղեկատվության և հասարակայնության վարչության պետ Արթուր Գևորգյանը, «ՀայՓոստի» գործադիր, այժմ նախկին տնօրեն Արման Խաչատուրյանը։
Վերջիններս տեղեկատվություն ընդհանրապես չեն տրամադրել։
