ԱԺ պատգամավոր Արման Բաբաջանյանը ֆեյսբուքյան իր էջում գրել է․
Այսօր Երևանում անցկացվում է Հավաքական անվտանգության պայմանագրի կազմակերպության Խորհրդարանական վեհաժողովի (ՀԱՊԿ ԽՎ) հերթական լիագումար նիստը։ Դրան մասնակցելու նպատակով Հայաստան են ժամանաել ՀԱՊԿ անդամ երկրների խորհրդարանների ղեկավարներ ու անդամներ:
Այսօրվա ընթացքում, գուցե նաև առաջիկա օրերին, մենք կկարդանք ու կլսենք ՀԱՊԿ-ի գործունեության արդյունավետության ու անփոխարինելիության մասին բազմաթիվ պաշտոնական հաղորդագրություններ, կհետևենք ՀԱՊԿ անդամ երկրների խորհրդարանականների ժպտադեմ ձեռքսեղմումներին: Տեղեկատվական այդ աղմուկի մեջ, սակայն, մենք վստահաբար չենք լսի արձանագրումներ այն մասին, որ առնվազն Հայաստանի նկատմամբ ՀԱՊԿ-ը չի կատարում իր պայմանագրային պարտավորությունները: Եվ դա ոչ թե ապրիորի քաղաքական գնահատական է, այլ փաստերով հիմնավորված արձանագրում:
Անցած ամիս Ադրբեջանը հերթական անգամ կրակահերթի ենթարկեց Հայաստանի Հանրապետության տարածքը՝ Տավուշի մարզի բնակավայրերը, ինչի արդյունքում ունեցանք վիրավորներ քաղաքացիական բնակչության շրջանում: Անցած շաբաթ Ադրբեջանը տարբեր տրամաչափի զենքերից կրակահերթեր արձակեց կրկին Տավուշի մարզի մի քանի գյուղերի ու մարտական դիրքերի ուղղությամբ, բարեբախտաբար՝ տուժածներ չեղան:
Ո՛չ քաղաքացիական անձանց վիրավորումների պատճառ դարձած, ո՛չ անցած շաբաթ արձանագրված կրակահերթերից հետո ՀԱՊԿ-ը հանդես չեկավ անգամ դատապարտող հայտարարությամբ՝ այն դեպքում, երբ, կրկնում եմ, անդամ որևէ երկրի նկատմամբ ռազմական ոտնձգության դեպքում այդ երկրի պաշտպանությունը ՀԱՊԿ-ի պայմանագրային պարտավորությունն է:
Սակայն թվարկված վերջին երկու դեպքերը ոչ թե բացառություն են, այլ օրինաչափություն: Հատկապես Տավուշի մարզի բնակավայրերի ու դիրքերի ուղղությամբ ադրբեջանական կրակահերթերը կրում են պարբերական բնույթ, գրեթե չի լինում ամիս, որ այդպիսի միջադեպեր չարձանագրվեն, սակայն ՀԱՊԿ-ը միշտ լռում է դրանց առնչությամբ: Այս խնդրի բարձրաձայնման դեպքում ՀԱՊԿ-ից սովորաբար արձագանքում են, թե Հայաստանի իշխանությունը չի դիմում ՀԱՊԿ-ին նման դեպքերում: Սակայն դա, ինչպես վերը նշվեց, ՀԱՊԿ-ի պարտավորությունն է, որը պետք է կատարվի առանց անդամ երկրի դիմումի:
Մյուս կողմից, սակայն, իրականության մեջ կա նաև ՀԱՊԿ-ում Հայաստանի ամորֆության խնդիրը: Հայաստանի իշխանությունները, անձամբ վարչապետ Նիկոլ Փաշինյանը, պարբերաբար խոսում են ՀԱՊԿ-ի գործունեության արդյունավետության բարձրացման անհրաժեշտության մասին, սակայն գործնական որևէ քայլ չեն կատարում՝ ստիպելու համար ՀԱՊԿ-ին կատարել Հայաստանի առջև ունեցած պարտավորությունները: Իսկ քանի դեռ Ռուսաստանի կայսերապաշտական նկրտումների բավարարման նպատակով ստեղծված այդ կառույցը շարունակում է իր անդեմությունը առնվազն Հայաստանի հետ կապված խնդիրներում, ՀԱՊԿ-ի արդյունավետության մասին խոսակցություններն անգամ անլուրջ են:
ՀԱՊԿ-ն ընդամենը մեկն է այն կառույցներից, որով Ռուսաստանն աշխարհին ցույց է տալիս իր թվացյալ հզորությունը: Այն որևէ գործառնական նշանակություն չունի և ծառայում է առավելապես ցուցադրական նպատակների, որի շրջանակներում էլ անցկացվում են կառույցի տարբեր միջոցառումները: Այս անգամ՝ Երևանում:
https://www.facebook.com/babajanyana/photos/a.2323937550970292/2822330621130980/?type=3&theater
