Այսօր՝ ապրիլի 12-ին, Գյումրու քաղաքապետ Սամվել Բալասանյանն ընդունել է Գյումրիում անցկացվող «Վերածնունդ» միջազգային 6-րդ մրցույթ-փառատոնի ժյուրի անդամներին և փառատոնի հյուրերին:
Բացման խոսքում քաղաքապետը ողջունել է 33 երկրներից Գյումրի ժամանած հյուրերին և կարևորել է փառատոնի անցկացումը հանրապետության երկրորդ քաղաքում՝ շեշտելով, որ այն մեծ աշխուժություն է հաղորդում քաղաքի մշակույթային կյանքին: Այնուհետև քաղաքապետը հակիրճ ներկայացրել է քաղաքի պատմությունը, մասնավորապես կանգ առնելով մշակույթային հարուստ ժառանգության և «Գյումրին՝ 2013 թ. ԱՊՀ մշակութային մայրաքաղաք» ծրագրի շրջանակներում անցկացված միջոցառումների վրա:
Պատասխան խոսքում փառատոնի կազմակերպիչներից, Երևանի պետական կոնսերվատորիայի Գյումրու մասնաճյուղի տնօրեն Կարինե Ավդալյանը շնորհակալություն հայտնեց քաղաքապետ Սամվել Բալասանյանից փառատոնին ցուցաբերած աջակցության համար և խոսեք միջոցառման տարեցտարի ընդլայնվող աշխարհագրություն ու ապագա նախագծերի մասին:
Խոսքով հանդես է եկել նաև Սանկտ-Պետերբուրգի կոնսերվատորիայի ռեկտոր Միխաիլ Գանտվարգը, Կազանի կոնսերվատորիայի ռեկտոր Աբդուլին Ռուբինը, երգչուհի Ռաիսա Մկրտչյանը և այլոք:
Հանդիպման ավարտին Սամվել Բալասանյանը հյուրերին հանձնեց Գյումրու մասին պատմող գրքեր և բարի երթ մաղթեց այսօր մեկնարկելիք «Վերածնունդ» փառատոնին:
