Արցախի «Միացյալ Հայաստան» կուսակցության առաջնորդ Վահան Բադասյանը հնարավոր է առաջադրվի Արցախում 2020 թվականին կայանալիք նախագահական ընտրություններում։ Այս մասին «Առաջին լրատվական»-ի հետ զրույցում ասաց ինքը՝ Բադասյանը, և ընդգծեց. «Դեռ որոշումը չկա, այժմ նախընտրություն ենք կատարում։ Այդ փուլն ավարտելուց հետո կլինի վերջնական որոշում»։
Մեր զրուցակիցը նշեց՝ համագործակցության օրակարգ չունեն. եթե մասնակցեն, առանձին կմասնակցեն. «Մեր նախընտրությունը հենց այդ նպատակով է, ուզում ենք ընդդիմադիր հարթակի մեջ միավորվել և նախընտրությունը կատարվի ընդդիմադիր հարթակից։ Մենք ընտրելու ենք այն թեկնածուին, որն առավելություն կունենա, որի շուրջը հնարավոր կլինի համախմբվել ու հաղթել։ Մինչ այժմ արծարծվող թեկնածուների մեջ չկա մեր ցանկացած թեկնածուն՝ նրանք կա՛մ իշխանական, կա՛մ նախկին իշխանական թեկնածուներն են։ Մենք ուզում ենք ժխտել նրանց, ժխտողական վերաբերմունք ունենք բոլոր իշխանական թեկնածուների նկատմամբ, ուզում ենք նորը։ Հին մեթոդներով հաղթանակած ապրելն անհնար է, մենք չենք ուզում գոյատևել, ուզում ենք ապրել այստեղ»։
Ինչ վերաբերում է ԱԳ նախարար Մասիս Մայիլյանի առաջադրմանը և այն տեսակետին, թե նա Երևանի նախընտրած թեկնածուն է, Վահան Բադասյանը պատասխանեց. «Նիկոլ Փաշինյանի օգոստոսի 5-ի հայտարարությունը միայն մեզ է վերաբերել, որ կաջակցի միայն մեզ։ Նա այդպես չասաց, բայց մենք հասկանում ենք, որ նա ժխտում է բոլոր իշխանական թեկնածուներին։ Պարզ ասաց, որ նախկին իշխանությունների մաս կազմած, կոռուպցիոն գործարքների մասնակցած և ռեժիմի մաս կազմող բոլոր թեկնածուներին նա մերժում է, և ՀՀ կառավարությունն ամեն ինչ անելու է, որ նրանք Արցախի ղեկավար չընտրվեն»։
Հարցին՝ Երևանը պե՞տք է դերակատարություն ունենա, մեր զրուցակիցն ասաց. «Երևանի կարծիքը կարևոր է, բայց վերջին հաշվով՝ ընտրողն Արցախի ժողովուրդն է ու Երևանի հորդորները լսելու է։ Նիկոլ Փաշինյանը ճիշտ դիրք է գրավել, համոզված եմ, որ անվանական որևէ մեկին չի աջակցելու, թողնելու է ազատ ընտրության։ Բայց որպես Հայաստանի անվտանգության և այլ հարցերի երաշխավոր՝ Հայաստանը պետք է կոշտ ձևով ժխտի այն ուժերին, որոնք մեզ տանելու են փակուղի։ Նա հենց դա արեց օգոստոսի 5-ին»։
