Business-Грузия-ի փոխանցմամբ՝ ձկան արտադրության ու արտահանման պլանում Հայաստանը տարածաշրջանում ունի ամենազարգացած շուկան։ Այս մասին գրում է վրացական The Financial պարբերականը։
Վրացական Aquafeed Georgia ընկերության գործադիր տնօրեն Իրակլի Պատարայան հայտարարել է. «Այդ ոլորտն Ադրբեջանում չի կարող զարգանալ ջրային վատ պայմանների պատճառով։ Ձկնարտադրության տեսանկյունից Հայաստանն ավելի զարգացած երկիր է, քան տարածաշրջանի մյուս երկրները՝ Վրաստանը և Ադրբեջանը։ Հայաստանը սպառում է 10 անգամ ավելի շատ ձկան կեր, քան Վրաստանը։ Այսինքն՝ ձկնաարտադրության տեսանկյունից Հայաստանը 10 անգամ գերազանցում է Վրաստանին»։
Նշվում է, որ ներկայումս Հայաստանում մոտ 200 ձեռնարկություններ զբաղվում են ձկնարտադրությամբ ու խեցգետնի մշակմամբ։ Նրանց տարեկան արտադրության ծավալը կազմում է մոտ 5000 տոննա։ Հայաստանի համար ամենամեծ շուկան Ռուսաստանն է. 2010 թվականին դեպի Ռուսաստան հայկական թարմ և սառեցված ձկնամթերքի արտահանումը կրկնակի աճել է՝ հասնելով մոտ 400 մետրային տոննայի։
Միևնույն ժամանակ գնալով աճում է կենդանի և հում ձկան ներկրումը Վրաստան։ Եթե 2009 թվականին ներկրվել է 26 միլիոն դոլարի ձուկ, ապա 2010 թվականին այդ ցուցանիշը կազմել է 30 միլիոն դոլար։ Ձկան արտահանման ծավալը կրճատվել է 5-6 անգամ, 2009 թվականին սառեցված և հում ձկան արտահանումը կազմել է 5 միլիոն դոլար, իսկ 2010 թվականին՝ 7 միլիոն դոլար։ Սառեցված ձկան արտահանման մոտ 98 տոկոսը բաժին է ընկնում Չինաստանին, Վիետնամին, Իսպանիային, Նորվեգիային ու Ճապոնիային։
Վրաստանում ամսական սպառվում է 80 տոննա իշխան, տարեկան ստացվում է մոտ 1000 տոննա։
